کندهار ښاروالۍ د ښار په مختلفو ناحيو کې د استنادي دېوالونو جوړولو د پروژې چارې پیل کړې.
په دې پروژه کې به ۵ زره مترمکعبه سنګ کاري وشي چې په کې کانالونه، ويالې او خوړونه شامل دي او په اساسي او معياري شکل به ورغول شي.
مسوولین وايي، پر دې پروژه شاوخوا ۱۴ ميليونه افغانۍ لګښت راځي چې په تطبيق کولو سره به یې خلک د سېلابونو له خطرونو، د ولاړو اوبو له بدبويي او چټليو خوندي شي او د تګ او راتګ په وخت کې به ګڼې اسانتياوې رامنځته شي.
د کندهار ښاروالۍ ویاند سیف الله عاصم وايي: « په دې پروژه کې به د ښار په مختلفو ناحیو کې هغه ماندونه، کانالونه او لښتي په اساسي توګه ورغول شي چې زموږ عام هېوادوال د بارانونو پرمهال د سېلابونو له خطر سره مخامخوي. په دې پروژه کې به د خلکو د غوښتنو په اساس ویالې، لښتي او کانالونه په اساسي ډول ورغوي. د استنادي دېوالونو دغه پروژه چې تقریبا ً ۵ زره مترمکعبه سنګ کاري کېږي، د ۱۴ میلیونه افغانیو په لګښت به یې رغنیزې چارې په ۴ میاشتو کې پای ته ورسېږي.»
د ښار اوسېدونکي د دې پروژې په پیل کېدو سره خوښ دي او وایي، دا ډول کارونه نه یوازې د چاپېریال د پاکوالي لامل کېږي بلکې د بارانونو او سېلابونو پر وړاندې هم د دوی سیمې خوندي کوي.
د کندهار اوسېدونکی ولي احمد وايي: « هرځل چې باران وشي، دلته زموږ کورونو ته اوبه راځي او موږ مجبورېږو چې خپل کورونه پرېږدو، نو اوس ډېر خوشاله یو چې دا پروژه پيل شوه.»
د کندهار ښار اوسېدونکی عبدالله وايي: « دوه ځله زما پر کور اوبه رااوښتې دي او زېر خانې مو له اوبو ډکې شوې وې، همدارنګه سړکونه او لارې یې خرابولې. اوس چې دا ویاله جوړېږي، موږ ډېره ورته خوشاله یو.»
په ياده پروژه کې به هره ورځ ۴۰ مسلکي او غیر مسلکي کسانو ته د کار کولو زمينه برابره شي او ټولې ساختماني چارې به يې د څلورو مياشتو په موده کې پای ته ورسېږي.
په یاده پروژه کې بوخت کارکوونکي که څه هم د دې پروژې د دوام او ډېرېدو غوښتنه کوي، خو د لنډمهال لپاره يې د روزګار په توګه مهمه ګڼي.
د کندهار ښاروالۍ د کانالیزاسیون انجینر مطیع الله وايي: « د دې پروژې موخه له کندهار ښار د سېلابي اوبو ایستل، د کورونو د ککړو اوبو ایستل او دغه راز د ښار د فاضلابو ایستل ده.»
یو تن کارکوونکی اختر محمد وايي: « ماته دلته د کار زمینه برابره ده او له دې امله ډېر خوشاله یم. بله خبره دا ده چې دا څو کلي له دې اوبو ډېر په تکلیف وو؛ اوس به هم له کلي اوبه بندې شي او هم به خلک په کار شي.»
په کندهار ښار کې هر کال د بارانونو پر مهال د کانالونو او خوړونو د بندېدو له امله زیات زیانونه اوړي او خلک له ډېرو ستونزو سره مخ کوي.
د کندهار ښاروالۍ مسوولینو په خبره، د دې پروژې په تطبیق سره به راتلونکي ژمي کې دا ستونزه تر ډېره حل شي.
