د کندهار ښاروالۍ د بې کارۍ د کمولو او د شپي مهال بازاري خدماتو ته د خلکو د لاسرسي د زیاتولو په موخه، د ۲۴ ساعته بازار د جوړولو پر پلان کار پیل کړی.
د ښاروالۍ چارواکي وايي، له دې کار څخه موخه یو شمیر وزګارو ځوانانو ته د کار زمینه برابرونه ده.
د کندهار ښاروالۍ مسوولینو په خبره، د دې بازار په پرانیستلو سره به ښاري خدمات په پراخه او اغیزمن کچه خلکو ته وړاندې شي.
د کندهار ښاروالۍ ویاند سیف الله عاصم وايي: « کندهار ښاروالي غواړي په کندهار ښار کې یو داسې بازار رامنځته کړي چې د ورځې ترڅنګ د شپې له مخې هم خلاص وي. دا بازار به ۲۴ ساعته خلاص وي او په کې به ډېرو کسانو ته د کار زمینه برابره شي. د دې بازار له جوړولو مو یوه موخه دا ده چې د شپې له مخې به ډېرو ځوانانو ته د کار فرصت برابر شي او ښاریانو ته به هم ګڼې اسانتیاوې رامنځته شي.»
د کندهار اوسېدونکي هم د ښاروالۍ د ۲۴ ساعته بازار جوړېدو له پلان هرکلی کوي او دا د بې کارۍ کمولو، خلکو ته د خدماتو رسولو او توکو ته د لاسرسي لپاره یو ښه فرصت ګڼي.
د کندهار ښاریان په نورو سکټورونو کې هم د دې ډول پروګرامونو د پلي کېدو غوښتنه کوي.
د کندهار ښار اوسېدونکی محب الله وايي: « ښاروالۍ په دې اړه ډېر ښه اقدام کړی او موږ تمه لرو چې داسې نور ښه ګامونه هم پورته کړي. په ښار کې ډېر داسې ځوانان شته چې وزګار دي او د کار زمینه نه ده ورته برابره شوې. که د شپې د بازارونو ترتیب جوړ شي، یو به خلکو ته د کار زمینه برابره شي او بل به هغو کسانو ته هم سهولت برابر شي چې د ورځې له مخې بازار ته لاسرسی نه لري.»
د کندهار اوسېدونکی جان محمد وايي: « دا کار ډېر زیات اهمیت لري او ورسره به اقتصاد هم ښه شي، خلک به په کار اخته شي، کاروبار به پر مخ لاړ شي او خلک به توکو ته لاسرسی پیدا کړي.»
د اقتصادي کارپوهانو په وینا، په کندهار کې د ۲۴ ساعته بازار جوړول د ښار پر اقتصادي وده مثبت اغېز کولی شي او دا پلان به نه یوازې نوي کاري فرصتونه رامنځته کړي، بلکې د کورني تولید په وده او په بازار کې د سیالۍ په پیاوړتیا کې به هم مرسته وکړي.
د اقتصادي چارو کارپوه امید الله قاسم زی وايي: « د شپنیو بازارانو جوړول له یوې خوا کولی شي په بازارونو کې نوښت او تنوع راولي او له بلې خوا کېدای شي د افغانستان داخلي تولیدات په دې بازارانو کې نندارې ته وړاندې شي او دغه راز خلکو ته د کار زمینه برابره کړي. که چېرې دغه بازارونه په سمه توګه مدیریت شي، اړتیا ده چې په لومړي سره کې د افغانستان خپل توکي په کې وپلورل شي.»
دا په داسې حال کې ده چې د کاري فرصتونو نه شتوالي او اقتصادي ستونزو ډېری ځوانان له ګڼو ستونزو سره مخ کړي. اوس تمه ده چې ۲۴ ساعته بازار يي د کارموندنې او د ژوند د ښه والي لپاره د یوه فرصت په توګه وګڼل شي.
