کندهاری ګل پلورونکی شرف الدین : کار پلمې او بهانې نه بلکې هڅه او زحمت غواړي

شراف الدین هغه کندهاری ګل روزونکی او پلورونکی دی،چې د بېکارۍ او غربت له لوړې کچې سره سره یې د ګلانو په روزنې او پلورنې  سره د خپلې کورنۍ اقتصادي اړتیاوې پوره  کوي. 

شرف الدین وايي:« زه د ګلانو د شنه کولو او روزلو دوې خونې لرم، ډول، ډول ګلونه مې په کې کرلي دي. زه یې شنه کوم، ږدم یې، روزنه یې کوم، بیا يې بازار ته وړاندې کوم، له سهاره تر ماښامه مې همدا کار دی.» 

شراف لدین، د ګلونو تخم او نهالګي د ژمي په دویمه میاشت کې کري، نژدې دوې میاشتې يې روزنه او پالنه کوي او د پسرلي په راتګ سره یې د پلور بازار ته وړاندې کوي.

 هغه زیاته کړه:« زموږ کار د ژمي په پيل کې پیل کېږي، نهالګي، د ګلونو قلمونه تخمونه کرو، له راشنه کېدو سره سم یې روزنه پیل کېږي، بیا یې پسرلي او د  ژمي په اخره میاشت کې په بازار کې پلورو.»

په دې وروستیو کې کندهار ښار کې د ګلانو د ساتلو او  پلورلو د خونو شمېر زیات شوی او سلګونه کسان له همدې لارې خپل او د کورنیو اقتصادي اړتیاوې پوره کوي.

د کندهار ښار اوسېدونکی احمد شاه وايي:«د نورو ولایتونو  پرتله د کندهار خلک د ګلونو د ساتلو او روزلو ډېر شوق لري. دلته تر اهلي نباتاتو، زینتي نباتات، خلک ډېر خوښوي.»

که څه هم له تېرو څو کلونو راهیسې د بیکارۍ کچه ورځ تر بلې لوړه شوې،خو ښايي د شراف الدین په څېر، د شخصي کار و بار، هڅې ډېری هغو ځوانانو ته د کار الهام او پیغام شي،چې دا مهال د بېکارۍ له امله ګنو ستونزو سره لاس او ګرېوان دي.