کندهار ولایت کې د دوبي په پيل کېدو سره ګڼې میوې پخېږي او بیا نورو هېوادونو ته صادرېږي.
خو سږ کال بڼوال وايي، د پلم، الوبخارا، الوچې او ورته نورو میوو فصلونه رسېدلي، خو صادرات نه دي پيل شوي.
د دوی په خبره، د پاکستان له لوري پر تازه مېوو د تعرفو لوړېدو له امله دا مېوې له صادرېدو پاتې دي او په کور دننه خرڅلاو یې لګښتونه نه پوره کوي.
بڼوال نذیر احمد وايي:« حاصل ښه وو، خو بازارونه نه شته، نه خرڅېږي، د پاکستان لاره بنده ده او ټکس یې لوړ کړی.»
بڼوال بسم الله وايي:« د پاکستان له خوا ټکس لوړ شوی، نه سوداګر ته ګټه کوي نه بڼوال ته. سږ کال ټولې مېوې موږ ته په باغونو کې پاتې شوې، حتا پرې شوی لګښت هم نه پوره کوي. موږ اوس دا مېوې ولایتونو ته استوو، خو بیا هم ګټه نه کوي.»
د دې مېوو پر راټولولو بوخت ځوانان هم روان حالت ته اندېښمن دي او وايي، په مناسبه بیه د مېوو نه پلورل کېدل د دوی پر ورځنۍ مزدوري هم بد اغېز کوي.
د تازه مېوو کارګر نوید احمد وايي: « سږ کال زموږ د ارغنداب مېوې ډېرې برکتناکې وې او هرې ونې ډېره مېوه نیولې وه، خو له بده مرغه بازار نه لري او موږ مجبور یو چې په بامونو یې هواره کړو، ترڅو وچه شي.»
د کندهار کرنې ریاست مسوولین ډاډ ورکوي چې د یادې ستونزې د حل په موخه يې هڅې پيل کړې دي.
د کندهار کرنې ریاست کې د مېوو او ترکاریو متخصص اېمل حکیمي وايي: « د کندهار په سطحه پر ۶۰۰ هکټاره ځمکو پلم کرل شوی چې کلنی حاصل یې ۳۰ زره ټنو ته رسېږي. د دغې مېوې حاصل د تېر کال په پرتله ښه دی.»
د کندهار کرنیزو چارو آمر شمس الرحمن موسی وايي: « اوس یو څه راټیټ شوی، لکه څرنګه چې تاسو اشاره وکړه، پاکستان له خوا تعرفه لوړه شوې. په دې اړه د وزارت په کچه او هم د ولایت مقام په سطحه هڅې روانې دي چې دا ستونزه حل کړي.»
د بڼوالو په خبره، پاکستان هر کال د مېوو په پخېدو سره لويې لارې تړي او له امله يې افغان بڼوالو او سوداګرو ته درانه مالي زیانونه اوړي.
دوی پر سرپرست حکومت غږ کوي چې د پاکستان پر ځای بدیلې لارې پیدا کړي.
