کندهارکې له جګړې وروسته پاکستانیو ځواکونو د اغزن غځولو کار درولی.
له پاکستاني ځواکونو سره د افغان دفاعي ځواکونو له جګړې وروسته د کندهار په سپين بولدک ولسوالۍ کې د اغزن سیم د غځولو کار درېدلی دی.
جنوب کې د ۲۰۵ اتل قول اردو ویاند تورن احمد صادق عيسی وايي، چې تېره ورځ د کندهار د سپين بولدک او ښورابک ولسوالیو د سروڅاهانو په سيمه کې د پاکستاني ځواکونو سره د افغان
سرحدي ځواکونو له څو ساعته جګړې وروسته جګړه او سيمه کې د پاکستاني ځواکونو لخوا د اغزن سیم د غځولو کار درېدلی او سيمې ته اضافي ځواکونه هم ليږل شوي دي.
عيسی وویل، چې افغان امنیتي ځواکونه دا مهال د تيار سئ په حال کې دي.
پاکستان له دغه جګړې وروسته په سمدستي توګه په سپين بولدک ولسوالۍ کې د دوستۍ دروازه هم د تګ راتګ پر مخ وتړله.
کندهار ولایتي چارواکي وایي، پاکستاني ځواکونو په دغه سیمه کې اغزن سیم غځاوه چې د افغان ځواکونو لخوا یې مخالفت شوی .
کندهار کې د سرحدي ځواکونو د درېيمي لوا درستيزوال ډګروال امين الله وایي، لومړی برید د پاکستاني ځواکونو لخوا وشو، چې وروسته د دوی له سخت غبرګون سره مخ شول.
له نښتې وروسته پاکستان په سپین بولدک کې خپله دروازه تړلې ده.
تر اوسه پاکستاني لوري د جګړې په تړاو تبصره نه ده کړې.
