د کندهار خاکرېز لاره چې دوه کلونه د خلکو پر مخ تړلې وه اوس بېرته خلاصه شوې ده.
د کندهار- خاکرېز لاره د ملکي وګړو پر مخ خلاصه شوې او عملیات یې پای ته رسېدلي.
دغه لاره له تېرو دوو کلونو راهیسې تړلې وه او اوسېدونکي یې له ګڼو ستونزو سره مخ وو.
چارواکي وایي، د دغې لارې د خلاصولو په موخه یې ۲۵ ورځې عملیات کړي او دا مهال پرې د امنیتي قرارګاوو، د جوړولو کار روان دی.
د لارې د خلاصون د عملیاتو قوماندان وايي، د دغې لارې د امنیت ټینګښت په موخه یې ۲۵ ورځني عملیات یې پای ته رسېدلي او وسله وال یې له دې لارې شړلي دي.
د سرحدي پوليسو د څلورم کنډک قوماندان ورور اڅکزی داسې وايي (( دغه لاره چې له دوه کلونو راهیسې د خلکو پر مخ بنده وه، موږ وکولی شول چې د پنځه ویشت ورځنیو عملیاتو په لړ کې مخالفین وځپو او دغه لار د خلکو پر مخ خلاصه کړو، اوس دلته کار روان دی چې امنیتي قرارګاوې جوړې کړو.))
هغه د دغې لارې په اوږدو کې وسله والو او خپل لورې ته د اوښتې مرګ ژوبلې په اړه څه نه وايي، خو ادعا کوي، چې له وسله والو یې ګڼې سيمې نيولي دي.
مسافرو چې له تېرو دوو کلونو راهېسې یې پر دغه لاره تګ راتګ نه و کړی، له چارواکو غواړي چې د لارې ساتنې په موخه امنیتي قرارګاوې زیاتې کړي.
په دغو عملياتو کي بوخت پوليس وايي، په ټول توان سره يې هڅه وکړه چې دا عمليات بريالي کړي، خو غوښتنه کوي چې د دوى د تنخواوو او نورو جنګي امکاناتو ستونزې حل کړي.
بل خوا د کندهار والي تېره ورځ په یوه امنیتي غونډه کې ډاډ ورکړی و چې د دغې لارې د ساتنې په موخه د ګڼو امنیتي مرکزونو جوړولو چارې روانې دي.
وسله والو طالبانو تر اوسه د دې لارې د خلاصون او عملياتو په اړه رسنيو ته څه نه دي ويلي.
