د امریکا متحده ایالتو ولسمشر مرستیالې کمالا هرېس له سي. بي. اس امریکايي تلویزیون سره په مرکه کې له افغانستانه د خپلو ځواکونو د اېستلو پریکړه ډيره مناسبه یاده کړه.
هرېس ویلي، په دغه پریکړه کې موجوده وه او د وخت د تقاضا پر بنسټ ورته دا ډیره ښه پریکړه ښکاري.
هغه ویلي، د ټرمپ حکومت له طالبانو سره ټولې هوکړې وروستۍ کړې وې او دوی یوازې د شل کلنې جګړې د پای لپاره، دغه هوکړه ماته نه کړه.
هارېس زیاتوي:« تر موږ تېر حکومت له طالبانو سره هوکړه کړې وه. اوس مهال زه باوري یم،که موږ دغه هوکړه نه وای عملي کړای،نو زه او ته به اوس په افغانستان کې د جګړې او هلته د امریکايي ځواکونو په اړه غږیدای. زه د خپل حکومت د دغې پریکړې په اړه هېڅ پښیمانه نه یم.»
هرېس د دې پوښتنې په ځواب کې،چې له وتلو وروسته د هوکړې پر بنسټ د افغان ولس پر وړاندې مسوولیت یې څومره ترسره کړی وویل،د ملګرو ملتونو له لارې اوس هم افغانستان ته بشري مرستې استوي.
هغه زیاتوي:« موږ د همدې له امله له ملګروملتونو او خپلو نورو متحدینو سره ګډ کار کوو،چې خپل مسوولیت ترسره کړو او د طالبانو په شتون کې هلته بشري مرستې ورسېږي.»
کمالا هرېس دافغان ښځو پر وضعیت اندېښنه څرګنده کړه او پر اسلامي امارت یې نیوکه وکړه،چې له افغان ښځو سره د دوی چلن د تمې خلاف او ناسم دی.
هغې زیاته کړې:« زه د افغان ښځو او نجونو په اړه ډېره اندیښمنه یم. طالبان له هغوی سره څه ډول چې په کار ده، هغه شان چلن نه کوي. موږ چې په دې تړاو له طالبانو څه ډول تمه لرله،د هغې خلاف کار کوي. موږ د دغه چلن په اړه ډېر اندیښمن یو.»
د امریکا ولسمشرجو بایډن مرستیالې هرېس د ترهګرۍ پر وړاندې د اسلامي امارات پر وړاندې پر مبارزې هم شکمنې څرګندونې وکړې او زیاته یې کړه،چې اوس هم د بېلابېلو ترهګرو ډلو له لوري دوی ته پیښ ګواښ پای ته نه دی رسیدلی.
