کرېملین ماڼۍ اعلان کړی چې د روسیې ولسمشر ولادیمیرپوتین د روانې اکټوبر میاشتې په نهمه نېټه تاجیکستان ته په سفر ځي او هلته به د دې هېواد له ولسمشر امام علي رحمان سره خبرې وکړي.
په تاجیکستان کې د روسیې سفیر ویلي، په دې لیدنه کې به د افغانستان په اړه هم خبرې وشي.
هغه د تاجیکستان له یوې محلي رسنۍ سره په مرکه کې ویلي، د افغانستان مسئله د مسکو او دوشنبې لپاره ډېره مهمه ده.
په تاجیکستان کې د روسیې سفیر سمیون ګریګوریف زیاته کړې: « موږ د افغانستان په اړه له تاجیکستان سره همغږۍ ته ډېر ارزښت ورکوو. دا همغږي که په دوه اړخیز ډول وي او یا د شانګهای سازمان د غونډې په چوکاټ کې؛ د روسیې او تاجیکستان امنیتي ادارې خپل منځ کې ډېرې نژدې اړیکې لري.»
د چارو څارونکي بیا تاجdکستان ته د پوتین سفر مهم بولي او وایي، په سیمه کې روان وضعیت له هر اړخه حساس دی او ښایي په دې چارو هم مخامخ اغیز ولري.
د دوی په خبره، ښایي د پوتین سفر د تاجیکستان او افغانستان ترمنځ اړیکې هم نرمې کړي.
د سیاسي چارو شنونکی شهسوار سنګروال وايي: « امکان لري چې پوتین د افغانستان او تاجیکستان ترمنځ یوه نوې سیاسي روغه جوړه وکړي او دا به د دواړو ولسونو په ګټه وي. په ټوله کې باید ووایم چې سیمې ته د پوتین سفر ګټور دی او ښايي د افغانستان او تاجیکستان ترمنځ نویو اړیکو ته لاره پرانیزي.»
په تاجیکستان کې د روسیې سفیر همدارنګه ویلي، د روسیې او تاجیکستان دفاع وزارتونه په دې هېواد کې د روسیې د ۲۰۱مې پوځي اډې د ظرفیت لوړولو او د دې هېواد د وسله والو ځواکونو د عصري کولو او سنبالولو په اړه هم بحث کوي.
د روسیې ۲۰۱مه پوځي اډه په تاجیکستان کې د روسیې تر ټولو لویه بهرنۍ پوځي اډه بلل کېږي.
د سیاسي چارو شنونکی معین ګل څمکنی وايي: « دا ډول لیده کاته چې په اوس وخت کې یې ولاديمیر پوتین له تاجيک ولسمشر سره کوي، کېدای شي په ترڅ کې یې تاجیکستان او د منځنۍ آسیا نور هېوادونه د افغانستان رسمیت پېژندلو ته وهڅوي، ترڅو له دې لارې خپله سیاسي موضع ګیري په سیمه کې پراخه کړي او له افغانستان سره اړیکې نورې هم ښې کړي.»
د چارو شنونکی خلیل احمد نادم وايي: « دا چې پوتین تاجیکستان ته ځي او هلته د دې هېواد له ولسمشر سره ګوري، ښايي د افغانستان په اړه هم خبرې وکړي او د تاجیکستان ولسمشر ته مشوره ورکړي چې د افغانستان حکومت په رسمیت وپېژني.»
د یادولو ده چې روسیه په نړۍ کې یوازینی هېواد دی چې د افغانستان اوسنی حکومت یې په رسمیت پېژندلی او دا هېواد له تېرو څو کلونو راهیسې هڅه کوي چې نورو هېوادونه هم وهڅوي چې له افغانستان سره تعامل ته را وړاندې شي.
