مخکیني ولسمشر حامد کرزي ویلي، امریکا او نور متحدین یې باید د افغان سولې په اړه روانو هڅو کې د افغانستان د ټولو ګاونډیانو اعتماد او باور له ځان سره ولري.
هغه چې کابل کې د سولې او امنیت یو کنفرانس کې خبرې کولې باور وښود چې د ګاونډیانو له باور پرته سوله نشي راتلی.
کرزي وویل، چې د سولې پر بهیر د باور رامنځته کېدو په هدف باید د ایران په ګډون ټولو ګاونډیانو ته په دغه بهیر کې پوره ونډه ورکړل شي.
حامدکرزي ویلي، افغانان سوله غواړي، خو پر افغان خاورې د امریکا او نورو هېوادونو ترمنځ معاملې نه غواړي.
هغه وايي، سولې ته د رسېدو لپاره افغانان باید د سولې په غونډو کې د مېلمه په صفت نه بلکې د اصلي مالک په توګه ګډون وکړي.
