په ملګرو ملتونو کې د کاناډا استازولۍ په خپل نوښت د افغانستان په تړاو د ملګرو ډلې غونډې ترسره کېدو خبر ورکړی.
د کاناډا استازولۍ ویلي، په دې غونډه کې د يوناما او سره صليب استازو د افغانستان بشري، سیاسي او اقتصادي وضیعت په تړاو معلومات شریک کړي.
په ملګرو ملتونو کې د کاناډا استازولۍ ویلي: « کاناډا د افغانستان د ملګرو ډلې غونډه رابللې ده. په دې غونډه کې یوناما او د سره صلیب نړیوالې کمېټې استازو د افغانستان سیاسي، اقتصادي او بشري وضیعت په تړاو معلومات شریک کړل.»
که څه هم د دې غونډې په اړه زیات جزئیات نه دي ورکړل شوي، خو شنونکي وايي د کابل استازي له موجوديت پرته د افغانستان په تړاو هر ډول غونډه پایله نه شي ورکولی.
د دوی په خبره، اړتیا ده چې ملګري ملتونه د افغانستان څوکۍ اوسني حکومت ته وسپاري، ترڅو وکولی شي د افغانستان په تړاو رامنځته کېدونکو بحثونو او اندېښنو ته په عیني واقیعتونو ولاړ او له نږدې ځواب ورکړي.
د دوی په خبره، نړیوال که د افغانستان سیاسي، اقتصادي او یا هم بشري مسایلو په تړاو هر ډول غونډه ترسره کوي، نو اسلامي امارت ته دې هم په کې د ګډون بلنه ورکړي.
د سیاسي چارو شنونکی نجیبالله جامع وايي: « د افغانستان د مشروع او رسمي استازو په نه شتوالي کې د افغانستان اړوند پرېکړې او هوکړې کول بې ګټې دي. زموږ تلپاتې ټینګار پر دې دی چې نړیوالو سازمانونو کې د افغانستان اړوند ټولې څوکۍ او د افغانانو د دریځ نیونې او غبرګون دریځونه وسپارل شي. دغه کار به د اعتماد جوړونې لامل شي، ښه درک به رامنځته کړي او په رغنده تعامل به پای ته ورسېږي.»
ځینې نور بیا په دې باور دي چې داسې غونډې په تېر کې هم ترسره شوې او له نتیجې پرته پای ته رسېدلې دي. د دوی په خبره، هغه هېوادونه چې د افغانستان په تړاو د افغان استازو له موجوديت پرته د غونډو جوړولو اعلان کوي او یا یې هم غونډې جوړې کړي دي، یوازې او یوازې نمایشي بڼه يې لرلې.
د سیاسي چارو شنونکی توریالی ځاځی وايي: « د افغانستان په اړه چې هره غونډه کېږي، که دا سیاسي وي، که اقتصادي یا هم امنیتي مسایل وي او یا هم د افغانستان د رسمیت پېژندلو خبره وي، دا هېڅ ګټه نه لري او یوازې نمایش دی. »
اسلامي امارت بیا تازه په دې اړه څه نه دي ويلي، خو له دې وړاندې یې په ډاګه کړې وه چې د افغانستان حکومت له استازو پرته د افغانستان پر وضیعت غونډې جوړول او یا هم بحثونه کول، مثبته پایله نه لري.
