اسلامي امارت د کازان اقتصادي فورم په څنډه کې له روسي چارواکو سره د خپل پلاوي ليدنې له لاسته راوړنو ډکې بولي.
دا ګډ حکومتي پلاوی د لوړو زدهکړو وزير شیخ ندا محمد ندیم په مشرۍ تللی و او هلته يې د ياد اقتصادي فورم په څنډه کې له روسي چارواکو سره د کانونو په استخراج کې د همکاريو پر جلب، د نفت او ګاز پر وارداتو، د سړکونو او اوسپنې پټلۍ پر جوړولو او دغه راز د سوداګرۍ پر پراختيا او د انرژۍ په چمتو کې پر همکاريو خبرې کړې.
د اقتصاد وزارت مسلکي معين عبداللطیف نظري وايي: « د لوړو زده کړو وزیر په مشرۍ د اسلامي امارت پلاوي په روسیه کې د یوې اوونۍ اقامت پرمهال د روسیې له جګړو چارواکو سره د یو شمېر مهمو او اساسي مسایلو په تړاو خبرې وکړې. په دغو مسایلو کې کانونه، نفت او ګاز، روغتیا، سړکونه، رېل پټلۍ، تجارت، ټرانزيټ او انرژۍ اړوند موضوعات شامل وو او په اړه یې ګټورې، رغنده او اغېزناکې خبرې لرلې.»
د اسلامي امارت پلاوي د کازان اوولسم نړیوال بحث په څنډه کې د پروګرام اړوند نندارتون ته هم ورغلی او هلته يې د هوايي خدمتونو وړاندې کوونکو، د ټکنالوژۍ توليدوونکو، د نفت او ګازو د استخراج او يو شمېر نورو نړیوالو شرکتونو له مسوولینو سره کتلي.
د لوړو زدهکړو وزارت ويلي، وزير يې له یادو شرکتونو څخه په افغانستان کې هم د پانګونې غوښتنه کړې.
د لوړو زدهکړو وزارت ویاند ضیاالله هاشمي وايي: « د لوړو زده کړو وزیر وویل چې افغانستان او روسیه ښې اړیکې لري او هیله یې څرګنده کړه چې افغانستان له روسیې او تاتارستان سره خپلې اړیکې لا ښې او پیاوړې کړي. دغه راز یې زیاته کړه، اقتصادي اړیکې مهمې دي، خو ترڅنګ یې د لوړو زده کړو، علمي همکاریو او متقابل تعامل پراختیا هم ځانګړی ارزښت لري.»
شنونکي روسیې ته د اسلامي امارت د ورغلي پلاوي سفر په سیاسي او اقتصادي برخو کې مهم بولي او ټینګار کوي چې دا ډول سفرونه د دواړو هېوادونو اړیکې لا پیاوړې کولی شي.
د اقتصادي چارو شنونکی جنت فهیم چکري وايي: « کازان غونډه کولی شي له اقتصادي، امنیتي او سیاسي پلوه ډېره ګټوره وګڼل شي او بله دا چې اوس اسلام دین په روسیه کې د دویم دین په توګه ثبت کېږي، دا هم ارزښت لري.»
د اقتصادي چارو کارپوه عبدالجبار ساپی وايي: « په دې غونډه کې له افغانستان سره د تخنیکي او ټکنالوژۍ په ګډون په ډېرو برخو کې ژمنې شوې دي.»
په دې سفر کې د عامي روغتیا وزارت مسوولانو هم د روسیې له روغتیايي چارواکو سره د دواړو لورو د تخنیکي ظرفیتونو پر لوړولو، د خوراکي توکو د کیفیت پر کنټرول، د معیارونو پر ورته والي او د صادراتو او وارداتو بهیر د ښه والي لپاره د همغږۍ پر رامنځته کولو بحثونه کړي.
