د کار او ټولنيزو چارو وزارت چارواکو د فني او حرفوي زده کړو په مرکز کې د نشه يي توکو له کارولو رغېدولو کسانو ته د يادو زده کړو پنځم پړاو پرانیست.
د دې وزارت چارواکي وايي، په دې تازه پيل شوې دوره کې به شاوخوا ۸۰۰ هغو کسانو ته چې د نشه يي توکو له کارولو رغېدلي، په پنځو برخو کې د څلور مياشتنيو فني او حرفوي زده کړو زمينه برابره شي.
د دوی په خبره، د کار او ټولنيز چارو وزارت په نشه يي توکو د روږدو کسانو د راټولولو او درملنې پروسې له پيل راهيسې شاوخوا ۶زره رغېدلو کسانو ته د فني او حرفوي زده کړو فرصت برابر کړی.
د کار او ټولنيزو چارو وزارت د کار معين زاهد احمدزی وايي: « له اعتیاد رغېدلو اشخاصو ته د فني او حرفوي زده کړو د ورکولو په لړ کې یوځل بیا دا دی ۸۰۰ تنو هېوادوالو ته په پنځو حرفو لکه خیاطۍ، بوټ ګنډلو، بیک ګنډلو، د ودانیو برېښنا غځولو او د برېښنايي توکو د ترمیم برخو کې د څلور نیمو میاشتو لپاره د فني او حرفوي زده کړو زمینه برابره کړې ده.»
د کار او ټولنیزو چارو وزارت د کار معین زياتوي، د سرپرست حکومت بېلابېلې ادارې ځينو هېوادونو ته د افغان کارګرانو د لېږلو هڅو ترڅنګ، په کور دننه هم د کاري فرصتونو رامنځته کولو لپاره د ټولنيزو پروژو تطبيق او د پانګونې جلب هڅې کوي.
د کار او ټولنيزو چارو وزارت د کار معين په دې اړه وايي: « د امیرالمؤمنین د حکم پر اساس، معلولو مجاهدینو ته هم په مرکز او ولایتونو کې د فني او حرفوي زده کړو زمینه برابروي. همدارنګه په جبري راستنو شویو کسانو ته هم په مرکز او ولایتونو کې د فن او حرفې مرکزونه جوړ شوي دي.»
په ورته مهال، که څه هم د نشه يي توکو له کارولو رغېدلي کسان دوی ته د فني او حرفوي زده کړو زمينې د برابرېدو له امله خوښ دي، خو له سرپرست حکومته غواړي چې کاري فرصتونه هم ورته برابره کړي.
له نشه يي توکو رغېدلی راشد وايي: « له اسلامي امارت ځانګړې مننه کوم چې موږ ته کسب او کار راښيي.»
له نشه يي توکو یو بل رغېدلی کس امیرالحق وايي: « زه غوښتنه کوم کله چې له دې کورس فارغېږو، موږ ته د کار زمینه هم برابره شي، ترڅو بېرته نشو ته مخه نه کړو.»
د کورنيو چارو وزارت مسوولین هم ټينګار کوي چې د اسلامي امارت د مشرتابه له فرمان سره سم به پر نشه يي توکو د روږدتیا د مخنيوي لپاره د يادو توکو د کښت، کاروبار او قاچاق مخه نيسي.
