Skip to content
د افغانستان د کاریګرو مرکزي ټولنې د دوشنبې پر ورځ د « ۱۴۰۰ کال د سلواغلې پر ۱۱ مه» کابل کې د بې وزلۍ، بې کارۍ او د کنګل شوې شتمنۍ د منفي اغیزو په تړاو خبري ناسته ترسره کړه.
په ناسته کې د یادې ټولنې مشر راز محمد احمدي وویل، لوېډیځ هېوادونه غواړي پرافغانستان د اقتصادي بندیزونو پر دوام سره دلته وضعیت بحراني کړي.
احمدي له امریکا او نړیوالې ټولنې غوښتنه وکړه،چې د افغانستان کنګل کړې شتمني دې ازاده او نور دې له اقتصادي فشارونو لاس واخلي.
احمدي وايي:« ستر لاملونه دا دي،چې یوه اندازه پیسې د افغانو نړیوالې ټولنې کنګل کړي او دا لامل کېږي،چې خلک خپلو بانکي حسابونو ته لاس رسی ونه لري. دا زموږ پیسې کولی شي، په اقتصادي برخه کې موږ ته اساسي رول ولوبوي.»
احمدي له اسلامي امارت هم وغوښتل،چې پر کور دننه خلکو ته د کار کولو زمینه برابره کړي، په طبیعي زېرمو پانګونه وکړي، تولیدي فابریکې جوړې کړي او د بازار اړتیا ته په کتو دې مسلکي کسان وروزي .
هغه زیاته کړه:« دا بشري ځواک چې له هېواده بهر کار کوي،د یوه هېواد په اقتصاد کې اساسي رول لري. هغه پیسې چې دوی په نورو هېوادونو کې ترلاسه کوي او دلته یي راوړي داسې ده لکه سره زر چې هېواد ته راوړې.»
خیرالله هغه بې وزله کس دی،چې خپلې کورنۍ ته د کراچۍ په چلولو روزمره نفقه برابروي، خو شکایت کوي،چې ماشومان یې ډوډۍ غواړي او ده ته کار نه شته دی،چې ډېری ورځې مازیګر مهال تش لاس کور ته ځي.
خیرالله زیاتوي:« بې کاري او بې روزګاري ده. ژوند مې تریخ دی اولادونه لرم،هغوی ټول ډوډۍ غواړي او زه یوازې کار کوم،نو مرستو ته اړتیا لرم.»
د افغانستان د صنفي ټولنې شورا په ورته وخت کې شااوخوا زر بې وزله کسانو باندې ژمني لباسونه هم ووېشل، چې د بهر میشتو افغانانو په مالي مرسته یې برابر کړي وو.
