کارپوهان: پر افغان ولس لګېدلي نړیوال بندیزونه بشري جنایت دی

شااوخوا دوه کاله کیږي،چې افغانستان له نړیوالو بندیزونو سره مخ دی او دغه سیاسي کړکیچ د ۴۰میلیونه افغانانو اقتصادي وضعیت له ناورین سره مخ کړی دی او له دوام یې اندیښنې زیاتې کړي.

د سیاسي چارو یو شمېر کارپوهان وايي، د امریکا او نورې نړۍ له لوري پرافغانستان لګیدلي  بندیزونه له افغان ولس سره چې په تیرو څلور نیمو لسیزو کې د دوی د نیابتي جګړو قرباني وو بشري جنایت دی.

د دوی په باور، که نړۍ رېښتیا هم ځان د بشري حقونو مدافع بولي او عدالت ولري، نو باید ژر تر ژره دې پرافغان ولس لګيدلي ټول بندیزونه لرې کړي.

 د سیاسي چارو کارپوه توریالی ځاځی وايي:« دغه بندیزونه، چې پرافغانستان باندې یوشمیر نړیوالو مغریزو هېوادونو او په ځانګړي توګه امریکا ، ایران او پاکستان له لوري وضع شوي دي، دا د افغانستان د۴۰ میلیونه خلکو پر وړاندې نه بښونکی بشري جنایت دی. دوی په تیرو ۴۵ کلونو پرمهال په افغانستان کې بشري جنګي جنایتونه ترسره کړي دي. که چیرې په نړۍ کې واقعا د بشر حقونه عدالت او دیموکراسي شتون ولري،  نړیوال هېوادونه باید ژر تر ژره دغو بندیزونو ته د پای ټکی کیږدي.»

ځینې نور بیا وايي،هغه بندیزونه چې نړۍ د افغان حکومت پر وړاندې د فشار په توګه کاروي زیات زیان یې عامو افغانانو ته رسیږي .

 دوی وايي،که دغه بندیزونه دوام وکړي پایلې به یې د ۴۰ میلیونه افغان ولس لپاره خطرناکې وي او اقتصاد بحران به لا پسې پراخ کړي .

د سیاسي چارو کارپوه سرور نیازی وايي:« کوم بندیزونه، چې نړیوال له هغې پر طالبانو د فشار په توګه کار اخلي، د دې ضرر دومره اسلامي امارت ته نه رسیږي، لکه څومره چې د افغانستان ولسونو ته رسیږي، بیکاري فقر ، ولږه او نړۍ سره د راکړې ورکړې نشتون د دې لامل شوی دی، چې په افغانستان کې ستر بشري ناورین رامنځ ته شي،چې له امله یې خلکو بهرنیو هیوادونو ته مخه کړې دی.»

 د سیاسي چارو هاتف مختار بیا وايي، له شک پرته چې د نړۍ بندیزونو افغانستان زیانمن کړی او د افغانانو ژوند یې سخت کړی دی.

د مختار په وینا، که امریکا د افغانسان پر وړاندې خپلې دغې پالیسۍ ته چې نوره نړۍ یې هم له ځان سره همغږې کړې، بدلون ورنه کړي،نو افغانان اړ دي،چې خپلې بقا لپاره د امریکا ضد قطبونو سره اړیکې ټينګې کړي.

هغه زیاته کړې:« کله چې تاسو یو ملت تحریموئ او تر فشار لاندې یې راولئ ‎، له دې سره که ستاسو له یوخوا دغه ملت ته ضرر رسوئ له بل خوا بیا افغانستان مجبور دی،چې په داسې صورت کې که امریکا له تحریمونو لاس وانخلي نو افغانستان به داسې قطب سره ودریږي،چې د افغانستان بقا په کې خوندي وي او دا د افغانستان ملي منافعو حکم دی.»

اسلامي امارت بیا پر افغان ولس د نړیوالو لګول شوي بندیزونه ظلم یاد وي.

له هغې وروسته، چې په افغانستان کې د جمهوریت ځای اسلامي امارت نیولی دی، نړۍ هم له افغانستان مخ اړولی او خپله رسمي راشه درشه یې بنده کړې .

اوس زیاتې هڅې روانې دي،چې یو ځل بیا له نړۍ سره د افغانستان پرې شوې اړیکې ټینګې شي خوتراسه یې  پایله  نه ده وکړې، غوښتنه داده چې دغې موخې ته د رسیدو لپاره دې هم نړۍ او هم افغان لوری انعطاف وښي.