د پاکستان ايکسپرېس ټرېبيون ورځپاڼې د دې هېواد حکومتي سرچينو په حواله راپور ورکړی، چې په کابل کې د ترسره شوې سيمهييزې همکارۍ ابتکارغونډې ځينو ګډونوالو هېوادونو له افغانستانه د ترهګرۍ پراختيا په اړه کابل ته په ليکلې توګه اعتراض کړی دی.
د راپور له مخې په دې هېوادونو کې پاکستان، چين، روسيه او ايران شامل دي او د تېرې جنورۍ پر ۲۹مه يې د افغانستان سرپرست حکومت ته اعتراض ليک سپارلی دی.
راپور کې وړاندې ویل شوي، د ترهګرۍ پراختيا په اړه کابل ته په ليکلې بڼه شکايت کول د پاکستان نوښت دی، چې په ليک کې له ذکر شويو هېوادونو سره هم شريک شوی دی.
خو د افغانستان سرپرست حکومت بيا دا نه مني، چې ګواکې د يادو هېوادونو له لوري دې ورسره کوم څه شریک شوې وي.
خو د سیاسي چارو کارپوهان دا کار د پاکستان شرارت بولي او زياتوي، چې ياد هېواد د خپلې روزل شوې ترهګرۍ په قضيه کې ځان ته د برائت په ورکولو سره افغانستان ګرم ثابتول غواړي.
د سیاسی چارو کارپوه توریالی ځاځی وايي: « اوس ټوله نړۍ په دې پوهېږي چې افغانستان کې ترهګر نشته او څوک چې دا ادعاوې کوي هغوی د دې هېواد دوښمنان دي، د دې ولس لپاره خاینین دي؛ نو طالبان باید دې هېواودونو ته نوره د ادعاوو زمینه برابره نه کړي.»
د سیاسی چارو کارپوه نجیب الله جامع وايي: « زموږ د نیمې پېړۍ تاریخ او د افغانستان د نن ورځې واقعیت دا دی چې افغانان تل د ترهګرۍ قرباني وو. هغه هېوادونه چې ترهګري د ابزار په توګه په بهرني سیاست کې کاروي او له خورا ډېرو ډالري او استخباراتي جګړو له لارې یې د سیمې او زموږ د هېواد ثبات ګواښلی دی؛ له دوی مو غوښتنه دا ده چې په خپلو ترهګرپالو سیاستونو دې بیا کتنه وکړي.»
يو شمېر هغه کارپوهان چې د سيمې وضعيت له نږدې څاري بیا وايي، په افغانستان کې هېڅ ترهګرۍ ډله شتون نه لري، خو ټينګار کوي، چې سرپرست حکومت دې پر افراطيت د پاکستان بنا سياستونو ته په پام، له ټولو سياسي قضاياوو سره مسوولانه او معقول چلن وکړي.
د سیاسي چارو کارپوه حکمت الله حکمت وايي: « افغانستان کې اوس لپاره د بهرنیو ترهګرو تشکیلات، کمپونه او یا هم نظامي موخې وجود نه لري؛ خو د (آی.ایس آی) په مټو د (سي.آی.اې) په غوښتنه ځېني بهرني جنګیالي په دا وروستیو کې د پاکستان له خاورې د افرادو په توګه د افغانستان بېلا بېلو سیمو ته را انتقال شوې دي.»
له دې وړاندې د تېرې جنورۍ په وروستيو کې په کابل کې د سيمهييزې همکارۍ ابتکار ناستې پرمهال د بهرنيو چارو سرپرست وزير ډاډ ورکړ، چې افغانستان په هېڅ صورت د سيمې د بېثباتۍ پلوی نه، بلکې په ټول قوت هڅه کوي، چې د سيمهييز ټيکاو په تحقق کې خپل مثبت رول ولري.
