له هغې وروسته چې اسلامي امارت په افغانستان کې واک ته ورسېد، د امریکا په مشرۍ نړیوالې ټولنې په دغه هېواد سیاسي او اقتصادي بندیزونه ولګول چې لاهم دوام لري.
په لومړیو کې تمې دا وې چې د دغو بندیزونو عمر به کم وي او لرې به شي؛ خو په دغه برخه کې نړۍ ورځ تر بلې په خپل دریځ ټینګار زیاتوي.
له بل لوري امریکا د افغان ولس نږدې لس میلیارده ډالره پانګه هم کنګل کړې چې دغې چارې د افغانانو پر ژوند ناسم اغېز کړی او پر یوشمېرچارواکو یې محدودیتونه وضع کړي دي.
اوس اسلامي امارت یو ځل بیا پر نړۍ غږ کړی چې پر افغانستان لګېدلي بندیزونه پای ته ورسوي.
کابل وايي، د دې وخت رارسېدلی چې د امریکا په مشرۍ نړیوال پرافغانستان لګېدلي بندیزونه له منځه یوسي، کنګل شوې پانګه یې ازاده او د افغانانو په واک کې ورکړي او همداراز د اسلامي امارت پر چارواکو لګېدلي سفري او یو شمېر نور تحریمونه هم لرې کړي.
د اسلامي امارت د ویاند مرستیال حمد الله فطرت وايي:« پر افغانستان د امریکا له لوري لګول شویو ناروا بندیزونو او محدودیتونو د منځه وړلو غوښتنه د افغانانو حق دی او بیا بیا یې دا غوښتنه کړې ده، چې د امریکا له لوري ټول اقتصادي بندیزونه باید ختم شي او افغانستان د خلکو شتمني چې د امریکا له لوري کنګل شوې ده ازاده او د افغانانو واک ته وسپارل شي. همداراز د اسلامي امارت په مشرانو چې کوم بندیزونه او محدودیتونه وضعه شوې دا هم باید ختم شي.»
خو نړۍ بیا په دې تړاو ځینې شرایط لري چې په وینا یې د نجونو د زده کړو او د ښځو د کار په برخه کې لاهم پرمختګ نه دی شوی او همداراز د نظام د څرنګوالي او ټولګډونوالي په تړاو هم کوم ګام نه دی پورته شوی.
خو اسلامي امارت بیا له وړاندې ويلي چې نظام یې ټولګډونه دی په کابینه کې یې د ټولو ولایتونو استازي حضور لري او د تېر نظام پنځه سوه زره مامورین لاهم په دولتي اداراتو کې پر خپلو دندو بوخت دي.
کارپوهان بیا وايي، پکار ده چې د نړۍ ټولې پلمې ورختمې شي، د نجونو زده کړې او د ښځو د کار مساله چې د افغان ولس غوښتنه هم ده، باید له اسلامي اصولو په اساس ورته زمینه برابره شي چې له دې سره به پر نظام د ولسونو باور لاپسې زیات شي.
د سیاسي چار شنونکی توریالی ځاځی وايي، له نړیوالو بندیزونو د وتلو یوازینۍ لار دا ده چې حکومت باید د عامو خلکو او نظام ترمنځ واټن په بشپړډول له منځه یوسي، سترې هېوادنۍ پرېکړې له ولس سره په مشوره ترسره شي او د ولسونو ترمنځ یووالي لپاره جدي کار وشي.
ځاځی زیاتوي:« د دغه ټولو ناروا جنایتونو او د بهرنیو هېوادونو د دغه بندیزونو یوازینۍ لار له ملت سره د اسلامي امارت یووالی او د ملت مشروعیت ترلاسه کول دي، دوی باید ټولې پرېکړې د ملت په مشوره ترسره کړي، څو ټول ملت د دوی ملاتړ وکړي او هغه وخت نړیوال بیا هېڅ نه شي کولی.»
په ټوله کې باور دا دی چې پر افغانستان د امریکا او نړیوالې ټولنې بندیزونو پر افغان چارواکو هېڅ ډول اغېز نه دی کړی خو د څلوېښت میلیونه افغانانو ژوند یې سخت کړی؛ نو نړۍ ته پکار ده چې عام افغانان چې تازه د پنځو لسیزو له اوږدو جګړو راوتلي دي، د خپلو سیاسي موخو قرباني نه کړي او په خپل دریځ کې دې بدلون راولي.
