له تیر یوه کال راهیسې سیمه او نړۍ همدا اندیښنه لري،چې په افغانستان کې ترهګري د پراخېدو په حال کې ده او له اسلامي امارته یې غوښتنه داده،چې باید پر وړاندې یې جدي مبارزه وکړي.
کارپوهان وايي، له اسلامي امارته د امریکا په ګډون د نړۍ او سیمې دا غوښتنه،چې د ترهګرۍ پر وړاندې دې مبارزه وکړي ناسمه ده،ځکه هر ډول بندیزونه یې پرې لګولي، امکانات یې په واک کې نه ورکوي او په رسمیت یې نه پیژني
دوي وايي،له ترهګرۍ سره د مبارزې لپاره سیاسي،اقتصادي او استخباراتي ګډې مرستې اړینې دي، هغه څه چې نړۍ یې د افغانستان له اوسني حکومت سره نه لري او بیاهم ترې د همکارۍ تمه کوي.
د سیاسي چارو کارپوه زلمی نصرت وايي:«د ترهګرۍ پر وړاندې مبارزه سیاسي، اقتصادي او اسخباراتي ګډو مرستو ته اړتیا لري،سره له دې چې نړیوال ورسره هیڅ ډول همکاري نه کوي بیا هم طالبان په دغه برخه کې تر ډېره بریده بریالي دي. دا سمه خبره نه ده،چې په رسمیت دې نه پیژنم،همکاري درسره نه کوم،خو ترهګرۍ سره مبارزه درنه غواړم،که له طالبانو سره د نړیوالو تعامل همداسې وي،نو ټوله سیمه به ناامنه شي.»
ځینې نور بیا وايي،د جمهوریت پرمهال د نړۍ ټولو استخبارات له هر ډول امکاناتو سره افغانستان ته راغلي ول،چې ترهګري له منځه یوسي،خو پاتې راغلل، اوس چې یې پر اسلامي امارت هر ډول بندیزونه لګولي اومحدود امکانات په واک کې لري، له ترهګرۍ سره د مبارزې غوښتنه ترې کوي، دا یو ډول ناانصافي ده،چې نړۍ یې دافغانستان له اوسني حکومت سره کوي.
سیاسي فعاله دیوه پتنګ وايي:« له ترهګرۍ سره د مبارزې لپاره دلته په افغانستان کې د نړۍ ټول استخبارات راټول شوي و او هر ډول امکانات یې په واک کې درلودل،خو بیاهم پاتې راغلل او ونتوانیدل،چې ترهګر له منځه یوسي او په سیمه کې امنیت راولي، اوس چې دغه غوښتنه له طالبانو کوي،هغه هم په خالي جیبونو، نه رسمیت پیژندنې او کمو امکاناتو باندې غواړي ،رهګر له منځه یوسي دا یو خیالي فکر دی.»
بل پلو د سیاسي چارو کارپوه حکمت الله حکمت وايي، نړیوالو د افغان ولس د غمیزې د کمولو امکانات بند کړي او اسلامي امارت تر اوسه نه دی توانیدلی دی،چې له نړۍ سره ګډه ژبه پیدا کړي او دا هغه ستونزې دي،چې قرباني یې عام افغانان دي.
حکمت زیاته کړه:« نړیوالې ټولنې د خپل غلط سیاست په واسطه باندې د افغان ملت د غمیزې د کمولو امکانات لا محدود کړي دي او اسلامي امارت د خپلو ځینو غلطو سیاستونو باندې نه دي توانیدلي،چې له نړیوالې ټولنې سره ګډه ژبه پیدا کړي، د دې وخت رارسیدلی دی،چې هم اسلامي امارت او هم نړیواله ټولنه د دې ملت د حق د ورکړې لپاره لاس په کار شي.»
کارپوهان وايي، که د افغانستان له نوي حکومت سره د نړۍ تعامل همداسې وي او په رسمیت یې ونه پیژني،نو د ترهګرۍ دغه اور چې دمګړۍ ورسره اوسنی افغان حکومت لاس او ګریوان دی، د نړۍ او سیمې هېوادونو ته هم ورسیږي.
