د اسلامي امارت دفاع وزیر ملا محمد یعقوب مجاهد وړمه ورځ په یوه رسمي سفر قطر هېواد ته تللی او هلته یې د دې هېواد د دفاع وزیر ترڅنګ، د وزیرانو شورا له مرستیال او یوشمیر نورو قطري چارواکو سره لیدلي دي.
د معلوماتو له مخې، د افغانستان دفاع وزیر له قطري چارواکو سره د لیدنو پرمهال د کابل او دوحې ترمنځ د دوه اړخیزو اړیکو پر پیاوړتیا ټینګار شوی او همدا راز د سیمې او نړۍ د وروستیو مسایلو په تړاو یې هم خبرې کړې دي.
د دفاع وزارت ویاند عنایت الله خوارزمي وايي: « په کتنه کې د دواړو لوریو تر منځ پر مشترکو موضوعاتو بحث وشو او د دوه اړخیزو اړیکو پر پیاوړتیا د ټینګار تر څنګ یې د سیمې او نړۍ پر وروستیو پېښو او تحولاتو هم خبرې وکړې.»
قطر په سیمه کې د امریکا مهم سټراټيژیک ملګری دی او له همدې امله دې هېواد سره اړیکې مهمې او ګټورې بلل کېږي. د چارو کارپوهان وايي، قطر له هر پلوه کولی شي د افغانستان په تړاو مثبت رول ولوبوي او له دې هېواد سره د سیاسي او اقتصادي اړیکو پراختیاؤ د افغانستان سیاسي او اقتصادي ثبات ته ګټه رسولی شي.
د پوهنتون استاد فیض محمد ځلاند وايي: « قطر په سیمه کې د امریکا د ګټو خوندي کولو لپاره یو له مهمو هېوادونو څخه دی. له قطر سره د سرپرست حکومت اړیکې ډېرې مهمې دي. دا خبرې نه یوازې د دوحې پروسې د دوام بلکې په سیمه کې د نویو پرمختګونو په تړاو د همکاریو ترلاسه کولو لپاره هم مهمې دي. دا چې دفاع وزیر قطر ته سفر کړی، حتمن به د افغانستان او سیمې سره د اړیکو په تړاو خبرې شوې وي. قطر کولی شي د افغانستان په زېربنايي او اقتصادي برخو کې پانګونه وکړي او دا کار کولی شي افغانستان ته سیاسي ثبات او ټیکاو راولي.»
د کارپوهانو په باور، د سیمې نور هېوادونه هم باید د قطر او نورو هېوادونو په څیر له افغانستان سره خپلې سیاسي اړیکې پراخې کړي او دا کار د ټولو خواو په ګټه دی.
د یو شمېر کارپوهانو غوښتنه دا ده چې ټولې خواوې باید له انعطاف کار واخلي او افغان ولس د خپلو سیاستونو قرباني نه کړي.
د سیاسي چارو شنونکی هاشم الکوزی وايي: « له اسلامي نظام سره تعامل او تګ راتګ او داسې سفرونه لکه مولوي یعقوب مجاهد چې قطر ته کړی، دا هم د افغانستان په ګټه دی او هم د سیمې. زه په ټولو غږ کوم چې دې ډول سفرونو ته ادامه ورکړي.»
ملا محمد یعقوب مجاهد قطر ته د خپل سفر پرمهال پر دې هېواد د اسراییلو برید غندلی او زیاته کړې یې ده چې افغان حکومت او ولس یې د قطرهېواد ترڅنګ ولاړ دي.
قطر د سیمې له مهمو هېوادونو دی او له امریکا سره نږدې سټراټیژيکه ملګرتیا لري.
