واک ته د اسلامي امارت له رسېدو وروسته یو شمېر سیاسیونو له هېواده بهر له اوسني سرپرست حکومت سره پر سیاسي مخالفت لاس پورې کړی او ان يو شمېر يې د وسلې پورته کولو ګواښ هم کوي.
تازه د مخکېني ولسمشر لومړي مرستیال عبدالرشيد دوستم ویلي، که امریکا يې ملاتړ وکړي د سرپرست حکومت پر وړاندې به جګړه پيل او د راتلونکي لوی اختر لمونځ به په کابل کې کوي.
خو د سیاسي چارو کارپوهان د نوموړي دا څرګندونې لاپې ګڼي او وايي، ورته اشخاصو او افرادو خلکو ته په تېر کې ازموينه ورکړې او د ناسمې نتيجې له امله يې د خلکو په منځ کې باور او وزن کم شوی دی.
دوی باوري دي، چې ياد اشخاص له اوسني سرپرست حکومت سره د هېڅ ډول تقابل توان او طاقت نه لري.
د سیاسي چارو کارپوه سید بلال احمد فاطمي وايي: « دوستم که دا خبره کوي چې زه لوی اختر دلته کوم؛ نو په خوب کې هم لوی اختر دلته نه شي کولی، دا تاسې ته ښه مالومه ده چې په ځلونو یې داسې خبرې کړي دي؛ خو که دومره قوت یې درلودلی نو دی چې په جمهوریت کې هم اعلی سرقوماندان و، د ولسمشر مرستیال و، ښه واک او پیسه یې درلوده، امریکایان یې هم په څنګ کې وو، هغه وخت یې هېڅ ونشو کولی، اوس یې چې هر څه له لاسه تللي نو څه کولی شي.»
د سیاسي چارو کارپوه خلیل احمد نادم وايي: « دا چې د شورای مقاومت په نامه دوی دا اعلان کوي چې موږ د دولت په مقابل کې نظامي عملیات کوو او مبارزې ته ادامه ورکوو؛ نو زما په نظر د دوی خبرې دومره جدي نه دي او نه پایله ورکوي، ځکه چې د امریکا او بریټانیا په شمول هېڅ بهرني هېواد له دوی ملاتړ نه دی کړی او نه یې کوي او له بهرني ملاتړ پرته دوی هېڅ هم کولی نه شي.»
په یوه بل غږیز کليپ، چې د کورنیو چارو وزارت پخواني وزير مسعود اندرابي ته منسوب دی، په کې د اوسني سرپرست حکومت پر ځېنو سیاسي مخالفینو د غلا تور پورې کوي او وايي، له خلکو د وسيلې په توګه کار اخلي.
اندرابي وايي: « احمد مسعود راولاړ شو نه په دولت کې و نه بل ځای، خو هغه دی لاړ، څوک څوک وتښتېدل او اوس یې څوک شاوخوا راټول دي؟ یو څلور کسان پنجشېریان یې چې ترڅنګ ولاړ دي چې ورته ووايي پر دوی غږ وکړه نو وايي ولې غږ وکړو، د پنجشېر خلک خو له احمد شاه مسعود سره ولاړ وو، غله نه وو، چکچکې یې هم نه کولې، د پکول په اندازه ځای یې چا نیولی نه و؛ نو څنګه اوس ونیول شو؟، ځکه چې ټول وتښتېدل او نه پوهېږم چې تاجکستان کې څه کوي.»
بل خوا د سیاسي چارو کارپوهان وايي، ځېنې هېوادونه له سرپرست حکومت سره دوه مخې پاليسۍ چلوي او په ریښتينې توګه ورسره ولاړ نه دي.
دوی وايي، د يو شمېر هېوادونو استازي په ښکاره او په پټه د سرپرست حکومت له مخالفینو سره ګوري او د ملاتړ ژمنې ورکوي.
د دوی په خبره اسلامې امارت ته په کار ده، چې د نړیوالو ترڅنګ د افغانانو مشروع غوښتنې ومني، څو بیا ځلې جګړو ته لاره هواره نه شي.
د سیاسي چارو کارپوه شهسوار سنګروال وايي: « زما په نظر ښه خبره دا ده چې اسلامي امارت په خپلو کړو وړو کې یو څه بدلون راوړي او هغه دا چې هغه څه چې د افغانستان خلک یې غواړي، سیمه او نړۍ یې غواړي؛ نو په هغې کې دوی باید جدي ګامونه پورته کړي او په دې کې اړینه د ښځو حقونه، د زده کړو او کار مساله ده.»
د سرپرست حکومت چارواکي که څه هم د عبدالرشيد دوستم او مسعود اندرابې تازه څرګندونو ته په غبرګون کې څه نه وايي، خو له دې وړاندې يې په وار وار دغه ډول څرګندوني تبلیغات بللي او ويلي يي دي، چی دغه سیاسي مخالفین هېڅ هم نه شي کولی او نه هم ولس ورباندې باور کوي.
