د افغانستان اسلامي امارت د ملي دفاع سرپرست وزیر ملا محمد یعقوب مجاهد له هغو څرګندونو وروسته،چې ډرون الوتکې د پاکستان له خاورې راځي، له غبرګونونو سره مخ دي.
د پاکستان بهرنیو چارو وزارت په یوه خبرپاڼه کې ویلي، له شواهدو پرته د افغانستان د دفاع وزیر دا تورونه غیر مسوولانه دي.
خبرپاڼه کې وړاندې لیکل شوي،دا له ډيپلوماټیکو اصولو سره په تضاد کې خبرې دي او د خواشینۍ وړ خبره ده.
کله مو چې په دې تړاو کابل کې د پاکستان سفیرمنصور احمد خان وپوښته،هغه هم د خپل حکومت له وروستي دریځ ننګه وکړه
خان زیاته کړه:« لکه څنګه چې د پاکستان بهرینو چارو وزارت په خبرپاڼه کې ویل شوي دي،موږ په دې باور یو،چې د پاکستان خاوره به د بل هېواد پرضد نه کارول کېږي او که چیرې د افغانستان د حکومت له خوا موږ ته جزئیات راکول کېږي،موږ چمتو یو،چې د ډیپلوماټیک چینل له لارې یې تعقیب کړو.»
اخوا د پاکستان د بهرینو چارو وزیر بلاول بوټو رویټرز ته ویلي،د پاکستان خاوره د افغانستان د هوايي حریم پر ضد نه کارول کیږي او د مولوي یعقوب له څرګندونو وروسته به هم یو ځل بیا پلټنه وکړي،چې دا موضوع حقیقت لري او که نه.؟
خو کارپوهان وایي،کابل لپاره د پاکستان دا وضاحت د منلو وړ نه دی او پر حقیقت ولاړ نه دی.
د سیاسي چارو کارپوه عصمت قانع وايي:« که چېرې موږ او تاسې د افغانستان جغرافیايي قلمرو وګورو، نو هېڅ امکان نه لري،چې د ایران له لارې څخه امریکايي ډرون په کابل کې عملیات وکړي. د مرکزي اسیا له لارې یې نه شي کولی، د چین له لارې یې نه شي کولی، یوازینۍ لاره،چې پاتې ده،هغه د پاکستان فضاء قلمرو دی،چې پر افغانستان ترې هوايي عملیات کېدای شي. له شکه پرته،چې د امریکا ډرون الوتکې د پاکستان لاره استعمال کوي او په دې برخه کې د پاکستان مطبوعاتو اعتراف او د لوړپوړو چارواکو اعترافونه،د امریکا متحده ایالتو اعترافونه د دې وړي،چې موږ پرې استناد وکړو. دا چې پاکستان په داسې حال کې اسناد غواړي،چې پر افغاني پرهرونو باندې خندا کول دي. پر یوه بربنډ شي باندې اسناد غوښتل، زه فکر کوم،چې د دوی حماقت به وي،نه زموږ حماقت.»
