د سیاسي چارو کارپوه خلیل نادم وايي:« په کابینه کې دا اوس ۱۷ کسان د ملګرو ملتونو، امریکا، اروپا او ان د روسیې په تور لیست کې دي. دا باید واوېستل شي او په کابینه کې باید تخصصي کسان ځای پر ځای شي،ترڅو هېواد له ستونزو خلاص شي. زه فکر کوم، په ځانګړې توګه سکتوري برخو کې باید تخصصي کسان ځای پر ځای شي. د افغانستان دننه او که بهر متخصص افغانان دي،چې پر فساد ککړ نه وي، هغوی باید وغوښتل شي او ځای ورکړل شی. »
په دې وروستیو کې د اسلامي امارت سیاسي مخالفینو ترمنځ هم خبرې شوي،چې واک ته د اسلامي امارت له رسېدو سره سم له هېواده تښتېدلي دي،خو اسلامي امارت په ښکاره ویلي، پخوانیو چارواکو ته د دوی په حکومت کې ځای نه شته دی، په نویو بدلونونو کې کابینې ته د تکنوکراتانو راوستل هغه هم په سکتوري او تخنیکي برخه کې کولای شي،د اوسني حکومت پر وړاندې د نړیوالو شکونه راکم او په اسلامي امارت لا زیات باوري کړي.
دوی وایي، له دې امله باور نه شته دی،چې په کابینه کې دې اساسي بدلونونه ولیدل شي.
د سیاسي چارو کارپوه بلال فاطمي وايي:« د اسلامي امارت سرپرسته کابینه،چې دا به څومره دوام وکړي. خو لومړیو کې دا نظر و،چې شپږ میاشتې به دوام وکړي او یا به هم تر یوه کاله پورې دوام وکړي. ددې لپاره کوم وخت نه دی ټاکل شوی،چې دا به کال دوام وکړي، له کال به لږ دوام وکړي او یا به له کال زیاته دوام وکړي. خو یو شی مالوم دی،چې هر وخت دغه پرېکړه نیول کېږي، دا به له هغه وخت سره اړیکه لري. دا به له وخت وړاندې وي،چې څوک ووایي، په کابینه کې به څوک وي.»
د اسلامي امارت د کابینې نږدې ۱۷ وزیران د امریکا،ملګرو ملتونو،روسیې او ان د اروپایي هېوادونو په تور لیست کې شامل دي.
د افغان ملت ګوند مشرر ستانګل شېرزاد بیا وايي، اسلامي امارت ته یې مشوره دا ده،چې د دیني عالمانو، ولسي مشرانو او د هېواد له پوهانو یو مجلس راوبولي او وروسته په بدلونونو او نړۍ سره په اړیکو او تعامل باندې ښه فکر وشي.
اوس به ولیدل شي،چې نوي کال کې به افغانان په کابینه او حکومت کې د بدلونونو شاهدان اوسي او که نه؟ خو تمه دا ده،چې مسلکي کسانو ته اړتیا ده او دا کار کولای شي ،افغانستان له اوسني بحران وباسي.
