د سیاسي چارو یو شمېر کارپوهان وايي، په دې وروستیو کې د افغانستان په ګاونډ او سیمه کې د هېوادونو ترمنځ ځينې سیاسي تحولات رامنځ ته شوي او ځینې هم د رامنځ ته کېدو په حال کې دي.
دوی وايي، د پاکستان ، روسیې او اوکراین وضعیت کولی شي، چې د افغانستان پر زیان تمام شي،خو د ځینو هېوادونو ترمنځ د سیاسي اړیکو ټينګښت بیا هغه څه دي، چې افغانان یې هم هېله من کړي دي.
دغه راز دوی وايي، د ریاض او تهران ، د روسیې او چین د پاکستان او مرکزي اسیا ترمنځ د اړیکو نږدېوالی د دې ښکاروندوي کوي،چې په سیمه او د افغانستان په ګاونډ کې مثبت سیاسي تحولایت رامنځته کېدونکي او په اوسنیو شرایطو کې دا د افغانستان لپاره ښه خبر دی.
د سیاسي چارو کارپوه سمیع یوسفزی وايي:« په سیمه کې ایران او عربستان عربي هېوادونو سوریه عراق ، روسیه او چین او پاکستان او مرکزي اسیا په دغه سیمه کې سیاسي تحولات راروان دي، له یو بل سره سیاسي رقابتونه اوس په ښو او نږدې اړیکو تبدیل کیږي دا به په سیاسي ، اقتصادي او سوداګرۍ باندې مثبته اغیز ولري.»
ځینې بیا وايي، په سیمه کې سم او ناسم وضعیت په دواړه حالتونو کې پر افغانستان اغیز کولی شي،خو له زیان یې ځان ساتنه او له فرصت یې ګټه پورته کول ځانګړې پالیسي غواړي.
د سیاسي چارو کارپوه سرور نیازی وايي:« افغانستان له کومو حالاتو چې په سیمه کې روان دي، لکه د ترکیې انتخابات، د پاکستان وضعیت، ایران او د نورو لرې او نږدې ګاونډیو چې په سیمه کې پراته حالات یې پر افغانستان مثبتې او منفې اغیزې درلودلی شي.»
خو پخواني چارواکي بیا وايي، په اوسنیو شرایطو کې چې افغانستان لاهم په رسمیت نه دی پیژندل شوی، د سیمې تحولایت یې پر وضعیت ناسم اغیز درلودلی شي.
پخواني وزیر عمر داودزي له شمشاد ټلوېزیون سره په خبرو کې ویلي، هغه مهال افغانستان د سیمې له مثبتو تحولاتو ګټه اخېستلی شي،چې په خپل کورني او بهرني سیاست کې بدلون راولي.
په ټوله کې غوښتنه داده، چې کابل باید د خپلو ولسونو او د نظام رسمیت لپاره د نړۍ پر وړاندې انعطاف غوره کړي، چې د مشروعیت ترلاسه کولو ترڅنګ د سیمې او نړۍ په تحولاتو کې هم ونډه ولري.
