د افغانستان لپاره د هند ځانګړي استازي جيپيسینګ پر مشرۍ یو هندي پلاوی کابل ته راغلی او د افغانستان د بهرنیو چارو وزارت سرپرست ترڅنګ یې له یو شمېر افغان سوداګرو سره لیدلي دي.
د سیاسي چارو یو شمېر کارپوهان وايي، له هند سره د افغانستان د اړیکو ټینګښت له اقتصادي او سیاسي پلوه د افغانانو پر ګټه دی.
دوی وايي، له هند سربېره د سیمې له ټولو هېوادونو سره د سیاسي او اقتصادي اړیکو پالل د افغانستان لپاره ارزښتناکه دي او پکار ده چې په دغه برخه کې ګړندي ګامونه پورته شي.
د پوهنتون استاد فیض محمد ځلاند وايي: « په سیمه کې له ټولو هېوادونو سره د افغانستان سیاسي، ټولنیز او اقتصادي تعامل ډېر ارزښتناک دی. په دې وروستیو کې چې له هند سره ځينې پرمختګونه په نظر کې نیول شوي او یا تر نظر تېرېږي دا ډېر مهم دي، له هند سره د افغانستان تعاملات کولی شي په سیاسي او اقتصادي ټيکاو کې ډېر مهم رول ولري.»
ځینې نور بیا وايي، کابل ته د هندي پلاوي راتګ دا هیلې زیاتي کړي، چې د افغانستان سرپرست حکومت له هېوادونو سره د رسمي اړیکو ټینګښت ته نږدې شوی.
دوی وایې، د سیمې ټولو هېوادونو ته پکار دي چې د افغانستان له سرپرست حکومت سره اړیکې وپالي او د سیاسي او اقتصادي اړیګو لپاره چې د دوی په ګټه هم دي ګامونه واخلي .
د سیاسي چارو شنونکی توریالی ځاځی وايي: « هند تل زموږ له هېواد سره مرستې کړي او دا ټولو ته مالومه ده، دا چې د هند استازی افغانستان ته راغلی او د اسلامي امارت له مشرتابه سره یې خبرې کړي دا یو ډېر نېک اقدام دی، ځکه هند خپله په سیمه کې یو قدرت دی او دا اسلامي امارت ته یوه هېله مندي ده چې ورو، ورو هېوادونه دوی سره له سیاسي، اقتصادي او ډیپلوماتیک پلوه اړیکې نیسي.»
د سیاسي چارو شنونکی شهزاده مسعود وايي: « زما په اند هند په سیمه کې یو لوی هېواد دی او په اوسنیو شرایطو کې باید ټول هېوادونه له افغانستان سره نېک او حسنه روابط ولري.»
سیاسي فعال کمال ناصر اصولي پر دې باور دی، چې په اوسنیو شرایطو کې دغه اړیکې د افغان ولس د اقتصادي پیاوړتیا لپاره مهمې دي، خو تر هغې چې د نجونو پرمخ د زدهکړو دروازې نه وي پرانېستل شوي او کورنی مشروعیت نه وي اخېستل شوی دا اړیکې به نیمګړې وي.
اصولي وايي: « تر هغې چې کورنی مشروعیت خپل نه شي، د نجونو پرمخ ښوونځي خلاص نه شي هر ځوان په دې باندې پوه نه شي چې په افغانستان کې راتلونکی څنګه دی تر هغې دا اړیکې نیمګړي دي؛ خو بیا هم ښه ده چې دا اړیکې وي، ځکه افغان ولس په اقتصادي لحاظ ډېر ځورېږي او باید له ستونزو د وتلو لارې پيدا شي.»
په ورته وخت کې د هند ځانګړي استازي په کابل کې له پخواني ولسمشر حامدکرزی سره هم لیدلي چې په دغه کتنه کې داوړو لوریو د زده کړو په برخه کې د هند پر همکاریو خبرې کړي دي.
