دوی وايي، بریتانیا او په ټوله کې لویدیځ هېوادونه غواړي،چې اسلاميامارت د دوحې هوکړې پر اساس په تدریجي ډول د یوه پراخ بنسټه حکومت د جوړښت لپاره خپله اوسنۍ تګلاره بدله او ټولو اقلیتونو او بشري حقونو ته دې درناوی وکړي.
کارپوه هدایت حنیف شینواری وايي:« که څه هم د بریتانیا حکومت ویلي،چې دافغانستان له نوي حکومت سره له معاملې پرته بله چاره نه لري او دا دا ښي،چې د بریتانیا حکومت د افغانستان له اسلامي امارت سره ښو اړیکو ټینګولو ته لېواله دی. دوی په دې اند دي،چې طالبان باید په تدریجي ډول د لویدیځ د غوښتنو پر اساس د یوه پراخ بنسټه حکومت د جوړولو لپاره باید خپله تګلاره بدله کړي، له طالبانو څخه د لودیځ غوښتنې دا دي،چې د اقلیتونو حقوقو بشري او د ښځو حقونو ته درناوی وکړي او د دوحې د هوکړې پر اساس ټول شموله حکومت رامنځ ته کړي.»
د بریتانیا حکومت ویلي،دافغانستان له نوي نظام سره له تعامل پرته بله چاره نه لري او له اسلامي امارت سره ښې اړیکې غواړي، خو په مشروط ډول.
اخوا ځنې کارپوهان بیا په دې باور دي،چې بریتانیا او ځينې نور لویدیځ هېوادونه له طالبانو سره د دیپلوماتیکو اړیکو دټینګولو لپاره او مذاکراتو پيل کولو لپاره لېواله دي،خو دا کار د رسمیت پیژندنې په مانا نه دی.
پخوانۍ دیپلوماته شکریه بارکزۍ وايي،د هېوادونو لپاره خپل داخلي امنیت مهم دی ا و انګلستان او نور لویدیځ هېوادونه نه غواړي،له افغانستانه ورته ګواښ پیښ وي.
بارکزۍ زیاته کړه:« په دې وروستیو کې موږ وینو،چې د بریتانیا حکومت او هم ټول لودیځ له طالبانو سره په یو ډول مذاکرات پیل کړي،خو دا په دې مانا نه ده،چې ژر تر ژره به دوی پر رسمیت پیژندل کېږي،خو کیدای شي،چې د دوی ترمنځ دیپلوماتیکې خبرې روانې وي،ځکه چې نړۍ او په تېره بیا بریتانیا نه غواړي،چې له افغانستانه د دوی داخلي امنیت ته ګواښ متوجه شي.»
خو اسلامي امارت د لودیځوهېوادونو دا لیوالتیا،چې له کابل سره دیپلوماتیکې اړیکې له سره ورغوي، د افغانستان او نړۍ پر ګټه ګڼي،خو زیاتوي،چې له نړیوالې ټولنې او نورو هېوادنو سره به یې اړیکې په اسلامي ارزښتونو او ملي ګټو ولاړې او متوازنې وې.
داسلامي امارت مرستیال ویاند بلال کریمي وايي:« دا چې بریتانیا او هم نور هېوادونه دا تمایل ښي،چې په افغانستان کې خپل سفارتونه پرانیزي او د روابطو او تعاملاتو نوی فصل رامنځ ته شي، اسلامي امارت یې هرکلی کوي،ځکه چې دا یو مثبت ګام دی. د افغانانو او نړۍ پر ګټه دی او اسلامي امارت غواړي،چې د خپلو ملي ګټو اسلامي ارزښتونو او د هېواد د خپلواک په نظر کې نیولو سره له نړۍ سره د نړۍ له ټولو هېوادونو سره له نړیوالې ټولنې سره یوه متوازن او په اصولو ولاړ سیاست مخ ته بوځي.»
کارپوهان په دې باور دي، که اسلامي امارت د افغانانو اسلامي او ملي ارزښتونو په رڼا کې نړیوال قوانین او کنوایسنونه ومني او د نورې اسلامي نړۍ په څېر له نړیوالو سره تعامل وکړي،هغه مهال د افغانستان د نړیوال مشروعیت مسله حل کېدای شي.
