د امریکا متحده ایالتو پر شیعه افغانانو د بریدونو له غندنې سربېره څو ځلې غوښتي دي،چې د دوی خوندیتوب ته باید جدي پام وشي.
د ساسي چارو یو شمېر کارپوهان وايي، واشنګټن له دې مسلې استخباراتي او سیاسي موخې ترلاسه کول غواړي.
دوی وايي،د امریکا متحده ایالت غواړي،افغانستان کې جګړه دوام پیدا کړي او د اوسني نظام پرضد خلک راپورته کړي.
د سیاسي چارو کارپوه یحی چاووش وايي:« په دې کې د امریکا سیاسي او استخباراتي موخې نغښتي دي او غواړي،چې افغانان یو او بل سره واچوي او یو او بل باندې یې شکمن کړي. په دې مانا،چې په دې تیارو کې درېیم لاس ښکیل دی،کار کوي،چې افغانان خپلو کې سره شکمن کړي.»
افغانانو په تېرو شلو کلونو کې لویه قرباني ورکړه،خو تر اوسه پورې یې د شیعه او سني ترمنځ کوم تقابل نه لیدل کېږي.
د خلاصون لاې شورا مشر سید اکبر اغا وايي، یو شمېر هېوادونه غواړي،افغانستان کې مذهبي تاوتریخوالي ته زمینه برابره کړي.
سیدا اکبر اغا وایي،د امریکا متحده ایالتو لاسوهنه لا پای ته نه ده رسېدلې او هڅه کوي،چې خلک د نظام پرضد راپورته کړي.
اکبرغا زیاته کړه:« د امریکا لاسوهنه اوس هم پای ته نه ده رسېدلې، اوس هم د دوی جنګي الوتکې ګرځي،داچې اوس دوی د شیعه ګانو موضوع راټینګه کړې، په دې نسبت نه ده،چې په شیعه افغانانو یې زړه خوږیږي غواړي افغانستان کې اور ته لمن ووهي تازه یې کړي هر قشر او سمت د حکومت په مقابل کې راپورته کړي.»
د اسلامي امارت د ویاند مرستیال انعام الله سمنګاني وايي، د وروستیو بریدونو عاملین له منځه تللي دي او داعش افغانستان کې کوم فزیکي حضور نه لري.
سمنګاني زیاته کړه:«هغه پدیده،چې مخکې یو غټ ګواښ وه،اوس د هېواد په یوځای کې هم فزیکي حضور نه لري. وروستیو بریدونو وښووله،چې دوی خپله وړتیا له لاسه ورکړې ده. ډېری عاملین یې بلخ او ننګرهار کې له منځه تللي دي او یا هم نیول شوي دي.»
کارپوهان وایي، افغانان باید خپل یوالی وساتي او د بهرنیو دسیسې چې غواړي، افغانان په مذهبونو او قومونو وویشي، تېر نه ایستل شي.
له نظام هم غوښتنه دا ده،چې افغانستان کې چا ته د کورنۍ او مذهبي جګړو او تاوتریخوالي موکه په لاس ورنه کړي.
