د سیاسي چارو یو شمېر کارپوهان وايي، پر اوکراین د روسیې له برید افغانستان هم د نورو هېوادونو په څیر بې اغیزې نه شي پاتې کېدی.
دوی وايي، دغه اغیزې به تر ډېره له نړیوالو سره د افغانستان اړیکې زیانمنې کړي او تر اوسه پورې چې د لویدیځو د تمرکز مرکز و، اوس به یې له پامه وغورځیږي.
د کارپوهانو په خبره، دا ځکه زیان رسوي،چې افغانستان اوس مهال تر بل هر وخت زیات نړیوالې رسمیت پیژندنې او پاملرنې ته اړتیا لري.
د سیاسي چارو کارپوه سید پاچا وايي:« افغانستان اوس مهال په داسې وضعیت کې دی،چې د نړیوالو پاملرنې او رسمیت پیژندنې ته اړتیا لري او له دې کړکیچ وروسته چې د هغوی پام اوړي،نو دا به ډېر وخت ونیسي، چې یو ځل بیا نړۍ افغانستان ته متوجه کیږي. د اسلامي امارت لپاره غوره دا ده،چې له هیچا سره په دې وخت کې اړیکې خرابې نه کړي.»
ځینې نور بیا وايي،اروپا چې تازه یې له افغان ولس سره په بېلابېلو برخو کې د ګڼو مرستو غږ کړی دی،د اوکرایني کډوالو ورتګ به یې له اقتصادي پلوه ملا ماته کړي او بیا به له افغانستان سره د مالي مرستو جوګه نه وي.
د سیاسي چارو کارپوه طارق فرهادي وايي:« پنځه میلیونه اوکرایاینان به اروپا ته کډوال شي، یو میلیون خو به یې یوازې پولنډ ته ولاړ شي او وبه منل شي. اروپا به خپله اروپا د بې ځایه شویو ځای شي. نور اروپايي هېوادونو کې به هم پنځه سوه زره کډوال وي،چې دا به د اروپا لپاره له اقتصادي پلوه ملا ماتوونکي وي. له دې امله به یې افغانستان ته پاملرنه او مرسته ډېره راکمه شي.»
د سیاسي چارو شنونکی بلال باور وايي:« مهم تاثیرات،چې پر افغانستان به یې ولري، یو دا دی،چې هغه ډلې چې د طالبانو پر وړاندې جنګیږي او د مقاومت لپاره راپورته شوي، نور به د غربي هېوادونو له لوري نه تمویل کیږي. ځکه غربیانو ته اوس اسلامي نړۍ او افغانستان اولویت نه لري.»
د دغو تحلیلونو پر تعقیب چې له افغانستان د امریکا وتل په دې مانا دي،چې د نړیوالو او په ځانګړې توګه د امریکا په سیاست کې بدلون راغلی او نور په افغانستان کې هېڅ ډول وضعیت ته لیوالتیا نه لري.
