کابل کې وړمه ورځ د سیمهییزې همکارۍ نوښت ناسته چې د بهرنیو چارو وزارت کې ترسره شوه، د روسیې، چین او ایران په شمول د ۱۱ هېوادونو استازو په کې ونډه درلوده.
په دغه ناسته کې د ګډون کوونکو هېوادونو ځانګړو استازو او لوړ پوړو ډیپلوماتانو ګډون کړی و؛ خو د پاکستان ځانګړي استازي اصف دراني په دغه ناسته کې له ګډون ډډه وکړه او پرځای یې په کابل کې د اسلام اباد شاژدافیرعبیدالرحمان نظاماني ګډون کړی و، چې له ډيپلوماتیک پلوه یې په غونډه کې د پاکستان ټیټ حضور په ډاګه کاوه.
د سیاسي چارو کارپوهان وايي، د کابل په ناسته کې د پاکستان کمرنګه او ټیټ ډیپلوماتیک حضور د دې ښکارندويې کوي، چې لاهم دغه هېواد د افغانستان قضایاوو ته د سړې جګړې په سترګه ګوري.
د سیاسي چارو کارپوه نجیب الله جامع وايي: « د کابل په محور د سیمې ۱۱ هېوادونو وروستۍ ناسته او په دې ناسته کې د پاکستان ټیټ ډیپلوماتیک حضور، یاد هېواد د لوی درستیز افغان دښمنه څرګندونې او په ټوله کې د پاکستان پالېسۍ او دريځونه په دې مانا دي چې لا هم پاکستان د افغانستان قضیې ته د سړې جګړې د افکارو پر بنسټ ګوري او هېڅکله هم یو واحد او پرمختللی افغانستان نه غواړي.
پر همدې بنسټ زموږ غوښتنه دا ده چې د افغانستان د بهرنیو چارو وزارت باید په همدې دریځ او فکر له پاکستان سره ډيپلوماسي او سیاست وکړي.»
ځينې نور بیا وايي، له افغانستان سره د پاکستان د مخالفتونو کچه تر دې لوړه ده چې اوس هغه سیمهییزې ناستې چې د افغانستان په ګټه یادېږي نه شي زغملی، ګډون ته یې زړه نه ښه کوي او که ګډون هم په کې کوي نو په ډېره ټیټه کچه یې وي.
دوی وايي، پاکستان هېڅکله هم په افغانستان کې ځواکمن مرکزي نظام نه غواړي او هغه نظامونه چې سر پورته کړي دوی یې مخالفت کوي.
د سیاسي چارو کارپوه کمال ناصر اصولي وايي: « پاکستان هره هغه نړیواله او یا سیمهییزه ناسته کې، چې په هغې کې د افغانستان موقف پیاوړی وي او افغانانو ته یې امنیتي او اقتصادي خېر ښګېڼه ورسي، دوه مخې لوبه لوبوي. تاسې په پرونۍ ناسته کې هم ولیدل چې پاکستان یو شاژدافیر رالېږلی و، دا په دې مانا دي چې ګواکې موږ د افغانستان له اوسني سرپرست حکومته په کوچنیو یا لویو مسایلو خفه یو، دوی په افغانستان کې پیاوړی قدرتمند حکومت نه شي زغملی او تل یې په بېلابېلو مسایلو کې له افغانانو سره خپله دښمني څرګنده کړې ده.»
په ټوله کې غوښتنه دا ده چې د پاکستان په شمول د سیمې ټول هېوادونه په خپلو کې د اقتصادي اتصال، سیاسي اړیکو او د سیمې د امنیت لپاره باید کوټلي او متحدانه ګامونه پورته کړي او له خصمانه سیاستونو دې لاس واخلي.
د سیاسي چارو کارپوه شهزاده مسعود وايي: « موږ غواړو افغانستان د نړۍ د همکارۍ مرکز وګرځي. زه هیله لرم چې د سیمې هېوادونه له نړیوالې ټولنې او په ځانګړې توګه له ملګرو ملتونو سره په همغږۍ د افغانستان د پرمختګ او ابادۍ لپاره یو څرګند او واحد دریځ خپل کړي.»
له دې وړاندې هم د افغانستان لپاره د پاکستان ځانګړي استازي اصف دراني د افغانستان په تړاو جوړه شوې یوه سیمهییزه ناسته کې له ګډون ډډه کړې وه او دا دویم ځل دی چې د اسلام اباد ځانګړی استازی د افغانستان پر ګټه جوړې شوې ناسته کې ګډون نه کوي.
د کتوونکو په باور له دې د پاکستان هڅه دا وه چې د کابل ناسته بې ارزښته وښي.
