کابل ښار له ځنډ وروسته د دوشنبې په ورځ د (۱۴۰۳ کال د وږي پر ۱۲مه) مازدېګر مهال چاودنې شاهد وه چې له امله یې ۶ تنو خپلو ژوند له لاسه ورکړ او ۱۳ نور ټپيان شول.
د کابل امنيې قوماندانۍ مسوولین وايي، پېښه د ښار شپږمې امنيتي حوزې اړوند کلا بختیار کې د لویې څارنوالۍ مخې ته شوې او په تړاو يې لا هم پلټنې دوام لري.
مسوولین ډاډ ورکوي چې د پلټنو په پایله کې به د يادې پېښې عاملان پيدا او د قانون له مخې، به سزا ورکړي.
د کابل امنیې قوماندانۍ ویاند خالد ځدراڼ وايي: « پرون مازدیګر د شپږمې حوزې اړوند کلا بختیار په سیمه کې یوه کس په ځان پورې تړلو چاودېدونکو توکو ته چاوده ورکړې چې له امله یې د یوې ښځې په ګډون زموږ شپږ ملکي وګړي شهیدان شوي او ۱۳ نور ټپیان شوي. په دې اړه د امنیتي ځواکونو څېړنې روانې دي او هڅه کېږي چې د دې ظالمانه پېښې عوامل پیدا او د قانون منګولو ته یې وسپاري. موږ د پېښې قربانیانو ته هم ډاډ ورکوو چې د پېښې عوامل به پیدا کوو او قانون به پرې پلي کوو.»
په ورته مهال، دغې چاودنې په کوردننه هم د مطرحو سياسونو غبرګونونه راپارولي.
پخواني ولسمشر حامد کرزي د کابل ښار په کلا بختیار کې د وړمې ورځې برید غندلی او خواشیني يې پرې څرګنده کړې.
هغه زیاته کړې: « ډېر خواشینی شوم چې د کابل ښار په کلا بختیار سیمه کې د چاودنې له امله زموږ یو شمېر هېوادوال شهیدان او ټپیان شول. دغه تروریستي عمل په کلکه غندم او خپل د ډاډګیرنې مراتب د دې غمجنې پېښې د شهیدانو کورنیو ته وړاندې کوم او زخمیانو ته یې د عاجلې روغتیا غوښتنه لرم.»
د سیاسي چارو کارپوه ادریس محمدي ځاځی و ايي:« اسلامي امارت باید د دا ډول پېښو د مخنیوي لپاره ګړندي ګامونه واخلي. ولس هم باید له حکومت سره د امنیت په ټینګولو کې ونډه واخل، ترڅو دغه شان غمجنې پېښې بیا تکرار نه شي.»
د پوځي چارو کارپوهان دغه او ورته نور بريدونه له افغانستانه د باندې پلان شوي بولي او زياتوي، د مخنيوي لپاره يې اړتيا ده چې سرپرست حکومت پر ډېورنډ فرضي کرښه او سرحدونو څار زيات کړي.
دوی دغه راز غوښتنه کوي چې د ورته بريدونو پيغامونو ته په کتو دې اسلامي امارت د دولتي ادارو او اکاډميکو مرکزونو امنيت ته پاملرنه زیاته کړي.
د پوځي چارو کارپوه توریالی ځاځی وايي: « پاکستان هېڅکله نه غواړي په افغانستان کې امنیت ټینګ شي. تاسو ولیدل چې د امریکا د استخباراتو مرستیال واضح وویل چې په افغانستان کې تروریستي ډلې نه شته؛ نو د همدې لپاره پاکستان په قصدي ډول دغه برید وکړ ترڅو نړۍ ته وښيي چې په افغانستان کې ترهګرې ډلې شته دي.»
کابل کې د وړمې ورځې چاودنې مسوولت تر اوسه پورې کومې ډلې پر غاړه نه دی اخیستی، خو له دې وړاندې د ورته بريدونو مسووليت د داعش ډلې منلي.
