کابل کې سلګونه کسان په بېلابېلو برخو کې له نهه میاشتنیو مسلکي او حرفوي زده کړو فارغ شول.
د کار او ټولنیزو چارو وزارت وايي، ۳۵۰ تنه د خیاطۍ، انګلیسي ژبې، کمپیوټر، ساختماني چارو او ورته نورو برخو کې له مسلکي زده کړو فارغ او د کار بازار ته وړاندې شول.
د دغه وزارت ویاند سمیعالله ابراهیمي وايي: « د ۳۵۰ په شاوخوا کې هېوادوال او په ځانګړې توګه ځوانان په اوو مختلفو حرفو کې فارغ او د کار بازار ته وړاندې شول، ترڅو د زده کړیو مهارتونو پر مټ په کاري بازار کې د شغل خاوندان شي. په دغو اوو حرفو کې د برېښنا، ساختماني انجنیرۍ، د کمپیوټر مهارتونه، د انګلسي ژبې زده کړه، خیاطي، فلزکاري او نل غځولو په حرفو کې یې زده کړې ترلاسه کړې.»
له حرفي او فني زده کړو فارغ شوي کسان هم د کارغوښتنه کوي.
د بهرام محمودي په نوم له حرفوي زده کړو فارغ وايي:« له دولت زموږ غوښتنه دا ده چې زموږ لپاره د کار زمینه برابره کړي. موږ فارغ شوي یو او تمه لرو چې په یوه ځای کې پرکار بوخت شو؛ ترڅو وکولی شو له خپلو زده کړو ګټه واخلو، ټولنې او دولت ته خدمت وکړو.»
سیر فضل وايي: « تقریبا ً یو کال شو چې دلته مو زده کړې وکړې. له دولت تمه لرو چې موږ ته د کار زمینه هم برابره کړي.»
د کاراو ټولنیزو چارو وزارت ومیاند سمیع الله ابراهیمي وايي، د بېکارۍ کچې راکمولو په موخه یې ځوانانو ته د حرفوي او مسلکي زده کړو لړۍ پیل کړې او هڅه به وکړي چې فارغ شویو کسانو ته د کار زمینه پیدا کړي.
ابراهیمي زیاتوي: « د کار او ټولنیزو چارو وزارت مطالعه او تحلیل دا ښيي چې د بېکارۍ کچه هغه هېواد وال ډېره تشکیلوي چې نا لوستي دي او یا مهارت نه لري. همدې ستونزې ته په کتو د حرفوي زده کړو پروګرامونه په لاره اچول شوي او په هره برخه کې که دا خصوصي سکټور وي یا دولتي ادارې، چې دوی ته په کې د کاري فرصتونو زمینه برابره کېدای شي، د کار او ټولنیزو چارو وزارت ژمنتوب لري چې دې برخې ته رسېدنه وشي او د کار موندنې په برخه کې هم اړین ګامونه واخلي.»
د کار او ټولنیزو چارو وزارت د مالوماتو له مخې، په تېرو نهو میاشتو کې یې نږدې ۳۴ زرو کسانو ته حرفوي او مسلکي زده کړې ورکړې او دغه لړۍ لاهم روانه ده.
د کاراو ټولنیزو چارو وزارت د کار معین زاهد احمدزی وايي: « د نهو میاشتو په اوږدو کې د کار او ټولنیزو چارو وزارت تر ۳۴ زرو پورې زده کوونکي فارغ کړي دي. دغه زده کوونکي په مختلفو حرفو کې روزل شوي دي.»
د بیکارۍ کچې راکمولو او خلکو ته د کار زمینې برابرولو سره اقتصادي پیاوړتیا رامنځته کېږي چې ورسره د خلکو په اقتصادي ژوند کې هم مثبت پرمختګ راځي.
