Skip to content
د کابل ښار اتلسمې حوزې اړوند دشتي برچي سیمه کې د سه شنبې پر ورځ د « ۱۴۰۱ کال د وري پر ۳۰ مه » د عبدالرحیم شهید په نامه ښوونځي او د ممتاز تعلیمي مرکز زده کوونکو باندې چاودنو، پر کوردننه او بهر پراخ غبرګونونه راپارولي دي.
د ماشومانو د خوندېتوب سازمان په دغه برید خواشیني ښودلې او په ټینګار یې ویلي، ښوونځي باید پر نښه نه شي.
د ماشومانو د خوندېتوب سازمان وايي:« د ماشومانو د خوندېتوب بنسټ په دغه برید غوسه شوی او په سختو ټکو یې غندي. موږ دغه برید چې ماشومان یې زخمیان کړي او وژلي ډېر خواشیني کړي یوو. هېڅ ښوونځی باید په قصدي ډول پر نښه نه شي او نه هم باید ماشومان ښوونځیو ته په لاره د ناخوندېتوب احساس وکړي.»
ملګرو ملتونو د ماشومانو د ماشومانو ملاتړ صندوق یا یوناما د زده کوونکو پر نښه کول بشري جنایت او عاملینو ته یې د مجازاتو غوښتنه کړې ده.
یوناما زیاته کړه:« په کابل کې نننۍ برید غندو. دا یو نه بښونکی جنایت دی. په ښوونځيو او ماشومانو برید کوونکي باید عدالت ته را کش کړل شي.»
د افغانستان مخکینی ولسمشر حامد کرزی هم دغې پيښې خواشینی کړی او دا یې بشري جنایت بللی دی.
د کرزي دفترد خبرپاڼې یوه برخه:« مخکینی ولسمشر حامد کرزی، په عبدالرحیم لیسه او تعلیمي مرکز ممتاز کې چاودنې چې په پایله کې یې یو شمیر زده کوونکي شهیدان او ټپیان شوي، په کلکو ټکو غندي او دا بشري جنایت د افغانستان د سولې او پرمختګ د دښمنانو کار بولي.»
د ملې روغې جوړې عالي شورا پخوانی مشر ډاکتر عبدالله عبدالله هم دا یو ترهګریز برید یاد کړی دی.
عبدالله زیاته کړې:« د نن ورځې ترهګریز برید، چې ډېری قربانیان یې زده کوونکي دي،په کلکو ټکو غندم. دا دردونکې پیښه د هېواد د سولې او ترقۍ دښمنانو کار بولم.»
په کوزه پښتونخوا کې د ملي جمهوري غورځنګ مشر او د پښتون ژغورنې غورځنګ مخکښ غړي محسن داوړ هم دا پیښه وحشتناکه یاده کړې ده.
داوړ زیاتوي:« د ښوونځي په نښه کول، د هغو وحشتناکه بریدونو لړۍ ده، چې افغانان يې له اوږدې مودې ښکار دي او لا هم دا لړۍ دوام لري. موږ د قربانیانو له کورنیو سره خواخوږي څرګندوو. نړۍ نه شي کولای، د افغانستان وضعیت له پامه وغورځوي.»
د ایران د بهرنیو چارو وزارت بیا پر ښوونځي برید غندلی او د عاملینو د مجزاتو غوښتنه یې کړې ده.
د ایران د بهرنیو چارو وزارت ویاند سعید خطیب زاده وايي:« په زړه تورو کافرو یو ځل بیا جنایت کړی او د افغانستان خاوره یې د تنکي ځوانانو په وینو ککړه کړه. دغو د دین مخالفینو د روژې میاشتې درناوی هم ونه کړ. د دې جنایت له غندلو سره سره له مسوولینو غواړو،چې د دې ترهګریزې پیښې عاملین پیدا او مجازات کړي.»
دغو خونړیو بریدونو ته په ملګرو ملتونو کې د افغانستان دایمي استازولۍ او په افغانستان کې د ملګرو ملتونو ځانګړي راپورتر هم غبرګون ښودلی او پر زده کوونکو برید یې بشري جنایت بللی دی.
پرونیو چاودنو کې یوازې د کابل روغتونونو ته شپږ جسدونه او ۲۰ تنه ټپيان ور وړل شوي او تر اوسه پورې د دې برید مسوولیت کومې ډلې نه دی منلی.
