Skip to content
کابل د سه شنبې په ورځ د سترې چاودنې او وسلهوال برید شاهد و، چې د ملکي وګړو په ګډون لسګونه کسانو ته پهکې مرګژوبله اوښتې ده. دا برید پر کابل عیدګاه جومات مخې ته د داعش ډلې له ځانمرګي برید نهه ویشت ورځې وروسته د سه شنبې په ورځ د کابل ښار لسمې ناحیې اړوند سیمه کې پر سردارمحمد داود خان روغتون ترسره شو. عیني کتونکي وايي، برید د روغتون دروازه کې په یوه ستره چاودنه پيل او دوه تنه وسلهوال بریدګر روغتون ته ننوتل او د طالبانو امنیتي کسانو سره یې نښته پیل کړه.
د ا.ا.ا. ویاند ذبیح الله مجاهد وایي، پر سردار محمد داود خان څلورسوه بستریز روغتون د داعش ډلې برید شنډ کړل شوی او په کې پنځه داعشیان وژل شوي.
مجاهد دغه راز وایي چې برید د پنځلسو دقیقو په منځ کې کابو کړل شو، د روغتون دننه چاته زیان ندی اوښتی، خو له روغتون څخه بهر ۳ ښځې ۱ ماشوم او ۳ تنه سرتیري وژل شوي او پنځه تنه نور ټپیان دي.
د پېښې له ځایه یوازې ایمرجنسي روغتون ته لس ټپيان ور وړل شوي دي. دا برید داسې مهال ترسره کېږي چې یو کال وړاندې په همدې ورځ داعش وسله والو پرکابل پوهنتون خونړی وسله وال برید وکړ، چې پرمهال یې ۳۱ کسان وژل شوي وو او له اتیاوو زیات ټپيان وو.
خو سرچینې بیا وایي چې له لومړۍ چاودنې څو دقیقې وروسته دننه روغتون کې یوه بله چاودنه هم شوې، چې ویل کېږي ځانمرګی برید و.
سرچینې بیا د طالبانو په ګډون د نولس تنو د وژل کېدو او له ۳۰ زیاتو د ټپي کېدو خبر ورکوي.
د کابل والي په یوه غونډه کې یاد برید غندلی او بریدګر یې د افغانستان دښمنان وبلل.
د کابل والي احمدالله بدر وایي: «ته کفري نظام غواړئ، که اسلامي نظام غواړئ، خو راشه ماسره ودرېږه. د اسلامي نظام په قیام کې، د اسلامي نظام په ترویج کې راسره همکار شه.»
د کابل والي که څه هم د کومې ډلې نوم ندی اخیستی، خو خبرداری یې ورکړی چې په هیڅ ځای کې خوندي نشي پاتې کېدای، پرته له دې چې تسلیم شئ.
دا پر یاد روغتون دویم برید دی چې ترسره کېږي، تېر برید په ۲۰۱۷ کال کې شوی، چې بریدګرو د داکترانو له یونیفورم کار اخیستی و او پرمهال یې ۳۰ تنه دولتي ځواکونه او داکتران وژلي وو او له ۵۰ زیات ناروغان، داکتران او امنیتي ځواکونو ته یې مرګ ژوبله اړولې وه. د یاد برید مسوولیت داعش ډلې منلی و، خو ددې برید په تړاو تراوسه د داعش خراسان ډلې څه ندي ویلي.
