Skip to content
په کابل کې نن دوشنبه د« ۱۴۰۰ کال د سلواغلې پر ۱۸مه» طبیعي پېښو ته د رسېدو برخه کې د کابل ریاست له ۴۰۰ اړمنیو کورنیو سره د اته قلمه خوراکي او غیر خوراکي توکو مرسته وکړه.
د یاد ریاست مشر محمد خوشحال زماني وايي، خیریه موسسې او نړیوال دې هم د افغانانو لاسنیوی وکړي او اړتیا ته په کتو دې له بې وزله افغانانو سره بېړنۍ مرستې وکړي.
زماني زیاته کړه:« څه د پاسه یوه میاشت کېږي،چې زه دې ریاست ته راغلی یم،تر اوسه مې له شپږ زره کرونیو سروې کړې او توزیع مو هم کړې، البته سروې خو نوره هم شوې او لا روانه ده. موږ هره اوونۍ یوه یا دوه توزیع حتما لرو.»
طبعي پېښو ته د چمتوالي وزارت وایي،کافي اندازه مرستې لري او په ۳۴ ولایتونو کې هره اوونۍ یو یا دوه ځله پر اړمنو کورنیو مرستې ویشي.
د یاد وزارت مرستیال شرف الدین مسلم وايي، د واورې ورښتونو او نورو طبیعي پېښو له امله چې د کومو ولسوالیو او لرې پرتو سېمو لارې تړل شوي،هغوی ته یې د خوراکي او نورو توکو د رسولو تابیا نیولې ده.
مسلم زیاتوي:« د بې وزله خلکو لپاره مو ډېره مرسته ټوله کړې. الحمد لله، په ۳۴ ولایتونو کې مرستې لرو او توزیع مو په هره اوونۍ کې یو یا دوه ځله وي.»
په دغه مرستو کې له وریجو او غنمو سربېره کمپلې، ترپال او نور ډول ډول مواد هم شامل وو،چې پر ۴۰۰ اړمنیو کورنیو وویشل شوې.
