د کابل ولایت شکر درې ولسوالۍ اړوند مرادبېک سېمه کې د اسلامي امارت پېژندنې په نوم د ښوونځیو له شاوخوا زر تنو زده کوونکو آزموینه واخیستل شوه.
دغه آزموینه د کابل عامه کتابتونونو او شکر درې ولسوالۍ د پوهنې آمریت د مسوولینو له خوا پيل شوې او د میربچه کوټ ولسوالۍ زده کوونکو هم په کې ګډون کړی و.
مسوولين وايي، دغو زده کوونکو ته يې یوه میاشت مخکې د اسلامي امارت پېژنې په نوم کتابونه ورکړي وو او نن يې ازموینه واخیسته او په خبره یې موخه یې د نوي نسل ذهنیت جوړونه ده.
د شکر درې ولسوالۍ د پوهنې آمر دانیال حنيفي وايي: « له دې ازموینې موخه دا ده چې زموږ زده کوونکي له فکري او ذهني پلوه وروزل شي، د خپل هېواد او امارت په اړه ټول مالومات ترلاسه کړي. په راتلونکي کې د امارت پېژندنې له کتاب سربېره نور پروګرامونه هم لرو.»
د ازموینې یو تن څارونکی استاد وايي: «زده کوونکي د کتاب لوستلو ته هڅوي او یو فرهنګ جوړېږي. دغه راز له مطالعې سره مینه پيدا کوي.»
د مسوولینو په خبره، د سیالۍ ۲۰ تنو بریالیو زده کوونکو ته بېلابېلي ډالۍ هم ورکوي.
ورته مهال د ازموينې ګډونوال خوښ دې او وايي، د دا ډول سیالیو تر څنګ دې په دینې او عصري زده کړو کې هم ازموینې واخیستل شي.
دوی وایي، دا ډول سیالۍ ځوانان د کتاب مطالعي ته هڅوي او غوښتنه کوي چې په راتلونکو سیالیو کې دې نجونو ته هم د ګډون اجازه ورکړي.
د ازموینې یو تن ګډونوال وايي: « هرڅه مې چې ولوستل زما په ګټه وو، ما په دې کتاب کې ولوستل چې اسلامي امارت زموږ هېواد جوړوي، سوله او امنیت راولي او موږ کولی شو ډاکټران او انجینران جوړ شوو.»
د ازموینې یو بل ګډونوال وايي: « اسلامي امارت یوه میاشت وړاندې دغه کتاب موږ ته راکړ او موږ د دې کتاب په لوستلو سره اسلامي امارت وپېژانده.»
ړ ازموینې یو بل ګډون کوونکی بیا وايي: « که غواړو چې افغانستان آباد شي، نو باید ښځو ته هم د زده کړو اجازه ورکړل شي. په یوه کورنۍ کې مور زده کړې ونه لري، اولادونه یې هم نا لوستي پاتې کېږي.»
مسوولین وایي، راتلونکې کې به د ولایتونو تر څنګ د کابل په ټولو ولسوالیو کې ورته سیالۍ پيل کړي چې د نظام او ملت تر منځ واټن له منځه لاړ شي.
