دا مرستې له یو شمېر کورنیو سره په داسې حال کې کېږي، چې هېواد کې له اقتصادي ناورین سره د مخ کسانو او بې روزګارۍ کچه لوړه شوې ده.
۳۴کلنه نفيسه چې د ۱۲ کسیزې کورنۍ سرپرستې پر غاړه لري وایي، د یوې مړۍ ډوډۍ د پیدا کولو لپاره د خلکو په کورونو کې کالي مینځي او له دې لارې خپلې کورنۍ ته حلال رزق پيدا کوي.
نوموړې شکایت کوي، چې د روژې په رارسېدو سره هېڅ خېریه بنسټ ورسره مرسته نه ده کړې او د سرپرست حکومت له دغو مرستو د هرکلي ترڅنګ وايي، چې یادې مرستې يې د اړتياوو پوره کولو لپاره بسنه نه کوي.
نفیسه زیاتوي: « خاوند مې معیوبه دی، په تېرو جنګونو کې ټپي شوی و، د کورنۍ غړي مې ټول ۱۲ کسان دي، په دې ۱۲ کسانو کې یو زوی مې په نشهيي توکو روږدی دی او په روغتون کې بستر دی؛ خو درملنه یې نه کېږي، زه خپله کار کوم او اولادونو ته نفقه پیدا کوم.»
راحتالله بیا له مزار شریف د دغو مرستو تر لاسه کولو لپاره راغلی. نوموړی د مرستو له وېش څخه خوښ دی او غوښتنه کوي، چې په راتلونکي کې دې هم ورسره مرستې وشي او ترڅنګ دې ورته د کار زمینې برابرې شي.
نوموړی له حکومت او مرستندویه بنسټونو ګیله من دی او وایي، دا یې لومړی ځل دی چې د خوراکي توکو مرسته ورسره کېږي.
راحت الله وايي: « هو! مرسته مې ترلاسه کړه او خوښ یم، ځکه روژه مې پرې تېرېږي. ماته یې زنګ وکړ او ان له مزاره دلته راغلم؛ نو چې مجبوري نه وي څوک له مزاره کابل ته مرستې ترلاسه کولو ته راځي؟ بس اړ وم چې راشم، باور په خدای وکړئ چې پور مې واخیست او راغلم دلته.»
په ورته مهال مسوولان وايي، یادې مرستې د حکومت د مشرتابه د حکم له مخې په کابل کې د ۵۰ زره سوالګرو له تشخیص وروسته له ۱۳ زره هغو سره د مرستو لړۍ پېل کړه.
په دې مرستو کې د ۵ زره افغانیو په ارزښت د خوراکي توکو بستې او نغدې پيسې شاملې دي، چې پر سوالګرو يې وېش پيل شوی.
د کورنيو چارو وزارت نشهیي توکو پر وړاندې د مبارزې معينيت د دفتر رئيس حسیب الله احمدي وايي: « د عالیقدر امیرالمومنین حفظه الله د حکم پر بنسټ چې د کورنيو چارو وزارت نشهیي توکو پر وړاندې د مبارزې معينيت ته یې حکم کړی، چې د هېواد په کچه سوالګر راټول کړي او د هغې تثبیت او څېړنه وکړي، کوم سوالګر چې مستحق وپېژندل شول له هغوی سره به هره میاشت د کورنۍ د هر غړي په سر ۲ زره افغانۍ مرسته کېږي او نن چې کوم پروګرام په لاره اچول شوی او تاسې یې وینئ؛ د دې له مخې هغو ۱۳ زره مستحقو تثبیت شویو کورنیو څخه۱۵۰ کورنیو سره مرسته روانه ده، چې په دې کې خوراکي توکي او د ۵ زره افغانیو په ارزښت مالي مرسته شامله ده.»
له دې وړاندې چارواکو ويلي و، چې د روژې پرمهال به له ۳۰ زره ډېرو سوالګرو ته مرستې ووېشل شي او هڅه کوي، چې په هېواد کې هېڅوک بیا د ځان مړولو لپاره سوال کولو ته مخه نه کړي.
