Skip to content
په کابل کې د کانکور د ازموینې یو شمېر ګډون کوونکي آزموینې ته اندېښمن دي او وايي، د کورونا وبا محدودیتونو او کرنتین یې پر درسی سیسټم منفي اغېز کړی او هغه ډول چې اړتیا وه، چمتووالی نه لري.
د کانکور ازموینې یو تن ګډون کوونکی آرش حلیم زاده وايي: «د ښوونځي زده کړو پر مهال یوه خوا او د کانکور آزموینو د پیل پر مهال بله خوا زموږ زده کړې اغېزمنې کړې تاوان یې را واړاوه.»
د کانکور ازموینې ګډون کوونکې مینه ایوبي وايي: «موږ هغسې خپلو زده کړو ته رسیده ګي ونه کړه، څنګه مو چې باید کړې وای. ډېرې ستونزې رامخته شوې، د ښوونځي درسونه مو هم داسې ونه ویل لکه مخکې به مو چې ویل، په دوو میاشتو کې مو کال خلاص کړ.»
د لوړو زده کړو وزارت شمېرې ښیي، سږ کال له کابله کانکور ازموینه کې ۵۸ زره کسانو ګډون کړی دی، چې ۳۲ زره یې نجونې او ۲۵ زره ګډون کوونکي یې هلکان دي.
د لوړو زده کړو وزیر عباس بصیر وايي: «په کابل پوهنتون کې ډېر مثبت اقدامات ترسره شوي، تر څو زده کړیالان ښې زده کړې وکړي. پوهنتون ته باید د کانکور آزموینې ګډونوال د ارزښتونو پر اساس لاره پیدا کړي.»
کلونه وړاندې د کانکور سیسټم له تقلب او درغلیو ډک وو، چې بې باوریو اغېز یې تر اوسه پورې د خلکو تر منځ پاتې دی، خو اوس ټینګار پر دې دی چې د کانکور سیسټم برېښناییز شوی او د هر ډول انساني مداخلي مخه په کې نیول شوې ده.
د ازموینو ملي ادارې مشر عبدالقدیر خموش وايي: «د خوښۍ ځای دی چې د کانکور آزموینه کې د نجونو شمېر زیات دی. له ستونزو سره سره چې بېلابېلو سېمو کې شته، د ښځو د زیات شمېر ګډون ښه زیری دی.»
هېواد کې د څوارلس سوم کال کانکور ازموینې په ثور میاشت کې پیل شوې، چې په ۳۳ ولایتونو کې یې پروسه بشپړه شوه، خو کابل د کورونا وبا له امله له کانکور ازموینې وروسته پاتې شو، چې نن یې له څو میاشتیني ځنډ وروسته دوې دوره ازموینه واخېستل شوه.
سږ کال په ټول هېواد کې له ۱۵۰ زره زیاتو کسانو کانکور آزموینه کې ګډون کړی دی، چې ۵۸ زره یې له پلازمینې کابل ول.
د کانکور ملي ادرې مسوولین وايي، د ازموینو له پای ته رسیدو لس ورځې وروسته به پایلې اعلان کړي.
