د کابل په بېلا بېلو سیمو کې سلګونه کورنۍ شته دی، چې د سرپناه له ستونزو سره مخ دي، او په خبره یې د اورښتونو پر مهال له ګڼو ستونزو سره مخ وي.
احمد شاه بابا سیمه کې یو شمېر بې سرپناه کورنۍ وايي، تر اوسه ورسره هيچا نه د سرپناه وسایلو او نه هم د خوارکي توکو مرسته کړي.
یو تن بې سرپناه وايي:« خپله يې وينئ، چې ډېر سخت دی، ماشومان په دې سپينو واورو کې تاويږي، په دې خېمو کې ژوند تېرو،نه کار، نه روزګار، نه څه شته او نه موږ سره له کومې خوا مرستې تر سره شوي دي.»
د ژمي په سړه هوا کې نه یوازې ماشومان بلکې ښځې او نارینه هم د مرګ له ګواښ سره مخامخ دي.
د پېښو پر وړاندې د چمتوالي وزارت د اطلاعاتو او مسوول محمد نسیم حقاني بیا وايي،له مرستندویه موسسو سره په تفاهم يې تېره اوونۍ کې له زیانمنو شویو او اړمنو لس زره کورنیو سره مرسته کړې او لا هم کار کوي،چې نورو کورنیو ته رسيدنه وکړي.
حقاني زیاته کړه:« پېښو ته د چمتوالي وزارت تېره يوه اوونۍ کې له نورو مرستندویه ادارو سره په همغږۍ لس زره اړمنو کورنیو ته د هېواد پر کچه خوراکي او غیرې خوراکي مرستې ویشلي دي.»
يوازې د کابل احمد شاه بابا مېنه نه ده،چې سلګونه کورنۍ په کې يخ ژمی له خېمو لاندې تېروي، بلکې د کابل په نورو سيمو کې هم سلګونه کورنۍ شته دی،چې دغه ډول ژوند کوي.
