د کابل ولایت امینې قوماندانۍ په چوکاټ کې ۳۶۰ تنو پولیسو ته چې افسران، ساتنمنان او سرتیري په کې شامل دي، د شپږو اوونیو په موده کې عقیدتي او امنیتي زده کړې ورکړل شوې او د فراعت سندونه یې ترلاسه کړل.
د کورنیوچارو وزارت وايي، دغو پولیسو په یاده موده کې بېلا بېلې زده کړې ترلاسه کړې چې د دندو د اجرا کولو پرمهال به یې عملي کړي.
د دغه وزارت د تامیناتو معین مولوي عبدالله مختار وايي: « له دې معسکر نه الحمد الله ۳۶۰ تنه فارغین لرو چې په مجموع کې ۷۱ تنه افسران، ۱۰۳ تنه ساتنمنان او ۱۸۶ تنه سربازان مجاهدین د ۴۵ ورځو زده کړو وروسته له دې معسکر فارغ شول.»
فارغ شوي پولیس بیا ډاډ ورکوي چې د خلکو د امنیت ټینګولو او جنايي جرمونو په له منځه وړلو کې به خپلې هڅې ونه سپموي.
فارغ شوی پولیس ضیا محمد مقدس وايي: « موږ ستاسو د میډیا له لارې ټولو هېوادوالو ته دا ډاډ ورکوو، که په سیاسي برخه کوي یا جنايي برخه کې، موږ چمتو یو او شپه ورځ مو یو کړې چې د خلکو خدمت به کوو. په دې برخه کې ډاډ ورکوو چې انشاالله په جنايي پېښو کې به هم کمښت راځي بلکې صفر ته به رسېږي.»
فارغ شوی پولیس محمد ناصر منګل وايي: « موږ په دې ۴۵ ورځو کې مختلف النوع زده کړې وکړې چې په کې بدني، عقیدوي، فزیکي او نورې برخې په کې شاملې وې.»
دغه راز بیا د فارغ شویو پولیسو له لوري له جنايي جرمونو سره د مبارزې یوه ننداره هم وړاندې شوه چې په کې په تمثیلي توګه د دوه تنو مجرمینو له لوري جرم ترسره کیږي، خو پولیس پر وخت د پېښې ځای ته ځان رسوي او له ځنډ پرته په پوره مسلکي توب د پېښې عاملین نیسي.
