کابل کې د کارګر ورځ په داسې حال کې ونمانځل شوه، چې لاهم څلور میلیونه کسان بې روزګاره دي.
د ثور یوولسمه د نورې نړۍ په څیر کابل کې هم د کارګرانو د ورځې په توګه و نمانځل شوه.
وروستۍ موندنې ښيي چې افغانستان کې لا څلور میلیونه کسان بې روزګاره دي او د ناچارۍ له امله بیا دوه میلونه ماشومان په درندو کارونو بوخت دي.
د کارګرانو ملي ټولنه وايي، د ښځو لپاره په کوم ولایت کې د کار زمینه نه ده برابره شوې.
دغې ټولنې په حکومت نیوکې کړي چې د دوی د فعالیتونو جواز او بانکي حسابونه یې ورته مسدوده کړي دي.
افغانستان یو له هغو هېوادونو چې له نیمايي زیات اوسیدونکي یې بې وزلي ځپي او له بې روزګارۍ زورېږي.
تازه موندنې ښيي چې څلور میلیونه کسان بې روزګاره دي.
اندېښنې دا دي که حکومت دغو څلور میلیونو کسانو ته کار پیدا نه کړي نو لرې نه ده چې د بې کارۍ له لاسه بحران رامنځ ته شي.
له بل لوري بیا بله اندېښنه د هغو کار ګرو ماشومانو په اړه ده چې په درندو کارونو بوخت دي او غوښتنه دا ده چې حکومت دې کارګرو ماشومانو لپاره د زدکړو زمنیه او ښځو ته بیا د کار چاپیریال برابر کړي.
د کارګرانو ټولنه په حکومت نیوکې کوي چې د دوی د کار جوازونه او بانکي حسابونه یې مسدود کړي. دوی وايي د یو کارګر میاشتنی عاید شپږ زره افغانۍ دی چې د دوی ستونزې نشي حل کولی.
له حکومت د کارګرانو غوښتنه داده چې کاري چاپیریال ورته برابر او د دوی د بې وزلۍ مخه دي ونیسي.
که څه هم د کار او ټولنیزو چارو وزارت وایي چې ګڼو خلکو ته یې د کار زمینه برابره کړې خو د کارګرانو ملي اتحادیه وایي چې هیڅ مرسته یې له دوی سره نه دي کړي .
