په کابل کې د چین سفیر وانګ یو د کورنیو چارو وزارت له چارسمبالي سراج الدین حقاني سره په لیدنه کې ویلي، افغانان حق لري،چې د خپلې خوښې او پر دیني ارزښتونو ولاړ نظام ولري.
وانګ یو وايي،هېواد یې ژمنه کوي،چې د افغانستان په کورنیو چارو کې به لاس وهنه نه کوي او نړیوال هم باید پردۍ مفکورې پر افغانانو تحمیل نه کړي،ځکه افغانان ورسره حساسیت لري.
وانګ یو زیاته کړې:« افغانان حق لري،چې په خپل هېواد کې د خپلې خوښې او په خپلو ديني کلتوري ارزښتونو ولاړ نظام جوړ کړي. چین هېواد ژمنه کوي،چې د افغانستان په کورنیو چارو کې به لاسوهنه نه کوي.د تیرو شلو کلونو تجربې زموږ مخې ته پرتې دي او موږ له نړیوالو غواړو،چې افغانان پریږدي د خپلې خوښې حکومت جوړ کړي او هڅه ونه کړي،چې پر افغانانو پردۍ مفکورې وتپی،ځکه افغانان له پرديو مفکورو سره حساسیت لري.»
دچین سفیر د افغانستان د تیرو دوه لسیزو ستونزو پړه پرامریکا اچوي او زیاتوي،چې واشنګټن باید په افغانستان کې د روان بشري ناورین مسوولیت ومني او په دغه برخه کې باید له افغان ولس سره مرسته وکړي او ګنګل شوې پیسې یې هم راخلاصې کړي.
وانګ یو زیاتوي:« د تیرو شلو کلونو د ټولو ستونزو پړه د امریکا پر غاړه ده،نو بايد چې په افغانستان کې رامنځته شوي بشري ناورین مسووليت هم امریکا پر غاړه واخلي او له افغانانو سره مرسته وکړي او هم ېې کنګل شوې شتمني ورخلاصه کړي.»
په ورته وخت کې وانګ یو وايي، له اسلامي امارته یې غوښتنه دا ده،چې د دوحې تړون له مخې باید د افغانستان خاوره د چا پرضد ونه کارول شي او بیجینګ هم له کابله همدا تمه لري .
د کورنیو چارو چارسمبالي وزیر سراج الدین حقاني بیا له بیجنګ تمه لري،چې د کابل اوسني حکومت په رسمیت پیژندنه کې ورسره مرسته وکړي.
حقاني ډاډ ورکړی،چې د افغانستان خاور به د هېڅ لوري پر ضد ونه کارول شي.
حقاني زیاته کړې:« چین هېواد دې له افغانانو سره په دې حساسو شرایطو کې خپلو مرستو ته دوام ورکړي او د افغانستان د نوي حکومت د رسمیت پیژندنې په برخه کې هم مرسته وکړي. اسلامي امارت ټولې هغه کړې ژمنې عملي کړي،چې له نړۍ او ګاونډیو هېوادونو سره یې کړې وې،چې د افغانستان خاوره به د هېچا پرضد نه کارول کېږي.»
اخوا د سیاسي چارو یو شمېر کارپوهان بیا وايي،چین د سیمې او نړۍ پر کچه له اقتصادي او نظامي پلوه زبرځواک دی او بېجینګ سره د کابل اړیکې کولای شي،په سیاسي او اقتصادي برخوکې ګټورې تمامې شي.
په کابل کې د چین سفیر زیاته کړه،چې امریکا غواړي،د اقتصادي بندیزونو په لګولو سره د خپلې ماتې غچ له افغانانو واخلي او واشنګټن ټول شموله حکومت، بشري او میرمنو حقونه، د بیان ازادي د پلمې په توګه کاروي،خو چین به د افغانانو ارزښتونو ته په درناوي له افغانانو سره کار وکړي،چې پر خپلو پښو ودریږي.
