کابل ښار کې د اوبو کمښت او ترځمکې لاندې اوبو د ښکته تګ په دوام، پرېکړه شوې چې په دې ښار کې تر ځمکې لاندې اوبو د ککړتيا مخنيوي او دغه راز د سطحي اوبو بېرته پاکولو لپاره د چټلو اوبو (فاضلابو) د تصفیې خونه جوړېږي.
د ښاري اوبو رسولو او فاضلابو دولتي شرکت وايي، دغه چاڼ خونه به په ۱۰۰ جرېبه ځمکه جوړه او په ورځ کې به د ۲زره متر مکعب فاضلابو د پاکولو او چاڼ ظرفیت ولري.
یاد شرکت ډاډ ورکوي چې د فاضلابو له چاڼ سره به د کابل ښار ۹۰ سلنه اوبه پاکې او ترڅنګ به يې د کرنې لپاره عضوي سره هم توليد شي.
د ښاري اوبو رسولو او فاضلابو دولتي شرکت د فاضلابو چارو د تنظیم رییس فایق الله جمال وايي: « دا تصفیه خانه به په نړیوالو معیارونو سمبال وي او د فاضلابو د تصفیه کولو د لوړ ظرفیت ترڅنګ به، د بیا تولید شویو موادو کیفیت ته هم په کې ځانګړې پاملرنه وشي.»
د نوموړي په خبره، د عضوي سرې له تولید او په کرنې او نورو اقتصادي برخو کې له کارولو سربېره به، د دې چاڼ خونې تصفیه شوې اوبه، د ښار شنو ساحو خړوبولو لپاره وکارول شي.
