کابل کې د پولیسو اکاډمۍ مسلکي او علمي کادرونه بې برخلیکه پاتې دي

په کابل کې د پولیسو له اکاډمۍ څخه د سلګونه فارغ شویو ځوانانو په استازیتوب یو شمېر یې شمشاد ته راغلي وو، وايي، د پنځه سوه محصلینو د فراغت مراسمو ته درې ورځې پاتې وې، چې تیر حکومت سقوط وکړ او اسلامي امارت واک ته ورسېد.

دوی له اسلامي امارت غواړي، فارغ مسلکي کسان دې د خپلې دندې مطابق د خپلو ځواکونو په لیکو کې استخدام کړي او د پاتې کسانو د زده کړو بهیر دې بشپړ کړي.

کابل کې د پولیسو اکاډمۍ محصل قیس منګل وايي: «د  ۵۰۰  محصلینو د فراغت مراسمو ته درې ورځې پاتې وې، چې نظام سقوط شو او موږ بې برخلیک پاتې شو.»

یو بل محصل نامدار هوتک بیا وايي: «پر موږ د بیت المال لګښت شوی او باید خپل هېواد ته خدمت وکړو. که موږ ته پاملرنه نه کېږي، دا به زموږ او هېواد په حق کې جفاء وي.»

دغه محصلین وایي، ټول عمر یې په زده کړو کې تیر شوی او جګړې ته نه دي تللي او ژمن دي چې خپلو خلکو او هېواد ته خدمت وکړي.

دوی زیاتوي، امارت دې د دوی او د نورو مسلکي کادرونو برخلیک مالوم کړي او د حکومت په پیاوړتیا کې دې ترې کار واخلي.

کابل کې د پولیسو اکاډمۍ محصل شفیع الله وايي: «موږ غواړو چې برخلیک مو مالوم شي، ځکه کلونه مو علمي او مسلکي زده کړې کړې دي.»

کابل کې د پولیسو اکاډمۍ یو بل محصل مصطفی وايي: «منو چې نظامونه تغیر کوي، خو موږ د افرادو لپاره نه، بلکې خپلو خلکو او هېواد ته کار کوو او چمتو یوو، چې اسلامي امارت سره کار وکړو.»

په همدې حال کې د کورنیو چارو وزارت د رسنیو او عامه اړیکو مشر قاري سعید خوستي ویلي، ټولو مسکلي او علمي کادرونو ته یې بلنه ورکړې وه چې خپلو خلکو او هېواد ته د خدمت لپاره دې دندو ته وګرځي او په وینا یې دوی پر خپل دریځ ولاړ دي.

خوستي زیاته کړه: «دغه ځوانان زموږ مسلکي کادرونه دي. د دوی له مسلک او وړتیا به کار اخېستل کېږي د دې هېواد او هېوادوالو لپاره.»

کابل کې د پولیسو اکاډمۍ شااوخوا ۸۰ کاله مخینه لري، چې اوس مهال په امنیتي، جنایي، سرحدي، لوجستیک او محابسو او ادارې برخو کې محصلینو ته په نړیوال معیار برابرې زده کړې ورکوي او دغه راز د داخل خدمت یا شپې پوهنځۍ هم لري.