یوه اوونۍ وړاندې د کابل ښار اتمې امنیتي حوزې اړوند شاه شهید سیمه کې د حاجي باغ اصیل زي په نوم سوداګر د وسله لرونکو کسانو له لوري په ډزو وويشتل شو او له پېښې څو ورځې وروسته يې روغتون کې ساه ورکړه.
د کورنۍ غړي یې وایي، نوموړی یو بې طرفه کس و او هېچا سره یې شخصي دوښمني نه درلوده، خو د وسله لرونکو کسانو له لوري په عام محضر کې ویشتل شوی او وژل شوی دی.
د وژل شوي سوداګر زوی احمد فهیم اصیل زی وايي: « زما پلار هېڅ وخت چا سره بد نه دي کړي، ټول خلک یې پېژني او تاسو کولی شئ پوښتنه وکړئ. که تاسو پرون د جنازې مراسمو ته راغلی وای، تاسو به لیدلي وو چې څومره ولسونه زما پلار ته درناوی لري. زما پلار سیاسي کس نه و، په نظام کې یې کار نه و کړی او یوازې په تجارت بوخت و.»
نوموړی له سرپرست حکومت او اړوند عدلي ارګانونو د عدالت غوښتنه کوي او ادعا کوي چې قاتل د حکومت ځينو چارواکو له نوم پر ګټې اخیستنې سره له خلکو په زور پیسې اخلي او ګواښونه ورته کوي.
احمد فهیم اصیل زی په دې اړه وايي: « د خدای په لحاظ نظام ته ووایئ چې له دې خلکو پوښتنه وکړي چې وژونکي سړي په دې ساحه کې څه کړي، په نظام کې څوک لري او څوک یې حمایه کوي؟ که وايي چې څوک یې نه حمایه کوي، نو آیا له حمایت پرته څوک نظامي جمپر اغوستی شي، آیا اوه اته میله سلاح څوک ګرځولی شي؟ سل فیصده تورې ښيښې ګرځولی شي؟ آيا څوک په خپل موټر نظامي آنتن لګولی شي؟ دا چې ۸۰ کلن سپین ږیری د سړک په سر په ډوزو ویشتل کېږي چې زما په ځای تاسو وای، له نظام مو څه غوښتل؟ زه فکر نه کوم د ویلو څه وي، نظام خپله ښه پوهېږي.»
په ورته مهال، امنیتي مسوولین د نوموړي د قتل انګېزه هدفي وژنه نه بلکې د دواړو اړخونو ترمنځ پخوانۍ حقوقي قضیه بولي.
دوی ډاډ ورکوي چې د قاتل د نیولو په اړه یې هڅې روانې دي او ډېر ژر به یې عدلي او قضایي ارګانونو ته وسپاري.
د اتمې امنیتي حوزې جنایي غړی سېدغني ریحان وايي: « زموږ ملګري او امنیتي پرسونل د مبارک تڼي لټه کوي او تر نیولو وروسته به دواړه لوري عدلي او قضايي ارګانونو ته معرفي کړو. موږ هېوادوالو ته ډاډ ورکوو چې موضوع هدفي وژنه نه وه بلکې دوی خپلو کې شخصي ستونزه لرله.»
د حاجي باغ اصیل زي د کورنۍ له مالوماتو سره سم، د نوموړي او اکبر تڼي چې په مبارک تڼي هم مشهور دی، ترمنځ د ځمکې پر سر یو نیم کلنه شخړه روانه وه چې بالاخره تېره اوونۍ دا قضیه په تاوتریخوالي بدله شوې او ۷۰ کلن حاجي باغ اصیل زي په کې ژوند بايلود.
