د شرکتونو ټولنې نن په کابل کې د یوې خبرې ناستې پر مهال وویل، د کورنیو چارو وزارت د یو شمېر ودانیزو شرکتونو درې میلیارده افغانۍ ګرځولي او په بېلابېلو پلمو یې ځنډوي.
یاده ټولنه وايي، په داسې حال کې چې د ولسمشر حکم هم لهځانه سره لري، له شپږو کلونو راهیسې یې پیسې ځنډول شوې دي.
د ودانیزو شرکتونو ټولنې مشر سید جواد حسین وايي: «موږ د ولسمشر حکم په لاس کي لرو او له تېرو شپږ کلونو راهیسي د ساختماني شرکتونو پیسې نه دي ورکول شوي، چي دغه پیسې درې میلیارده افغانۍ کېږي.»
یادې ټولنې خبرداری ورکړ، که پيسې یې ورنه کړل شي، اعتراضونه به پراخ کړي، خو د کورنیو چارو وزارت بیا وايي، په دې تړاو یوه کمېټه جوړه شوې او اسناد یې څېړلي دي.
د کورنیو چارو وزارت مرستیال ویاند حامد روشن واي: « د کورنیو چارو وزارت له لوري یوه کمیټه جوړه شوې وه او د ودانیزو شرکتونو په تړاو یې هر اړخېزې څیړنې کړي او راپور د جمهوري ریاست د چارو ادارې ته سپارل شوی دی.»
د ودانیزو شرکتونو ټولنه وايي، په سختو شرایطو کې یې د هېواد په ۳۴ ولایتونو کې د کورنیو چارو وزارت ۳۱۰ پروژې پلي کړي، خو پيسې یې نه ورکول کېږي.
