ټاکل شوې د صنعت اوونۍ په مناسبت په کابل کې صنعتي توکو ته د بازار موندنې په موخه اونيز نندارتون پيل شي.
دغه ننداراتون به د غبرګولي )جوزا( پر ۶ مه پيل او ۷ ورځې به دوام ولري او په کې به د کورنيو شرکتونو له لوري په ۷۰۰ غرفو کې بېلابېل کورني صنعتي توکي نندارې ته وړاندې شي.
د خصوصي سکټور چارواکي دغه نندارتون د کورنيو صنعتي توليداتو لپاره د بازار موندنې په برخه کې بې ساری فرصت ګڼي او د صنعت نسبي ودې ته په کتو وايي، دا مهال افغانستان په ۱۳۸ سکټورونو کې پر ځان بسیاینې ته رسېدلی.
دوی له خلکو او سرپرست حکومته غواړي چې د کورنيو توليداتو په کارولو سره د صنعتکارانو ملاتړ وکړي او په دې توګه په هېواد کې د کاري فرصتونو په اېجاد کې همکاري وکړي.
د کانونو او صنایعو خونې ریيس شېرباز کمین زاده وايي: « اوس چې موږ کوم نندارتون جوړ کړی، دا له تېرو څلورو کالو راهیسې د ثور میاشتې په پای کې هر کال جوړېږي، خو سږ کال به په ډېرو شاندارو مراسو جوړ شي. د افغانستان د صنایعو او کانونو خونې د استازي په توګه خپلو هېوادوالو ته ډاډ ورکوم چې موږ په ۱۳۸ سکټورونو کې د هېواد خودکفايي اعلانوو. تاسو به سبا بل سبا زموږ تولیدات په همدې نندارتون کې ووینئ او دا به د خوکفايي په اړه زموږ د ادعا مصداق وي.»
که څه هم سوداګر او صنعتکاران ورته نندارتونونه بې ګټې نه ګڼي، خو ټينګار کوي چې د کورنيو توليداتو د ملاتړ لپاره دې سرپرست حکومت پر عوضي وارداتو تعرفه لوړه کړي.
د کانونو او صنایعو خونې ریيس په دې اړه وايي: « موږ به په څلورو سالونونو کې ۷۰۰ غرفې ولرو او په کې ټول داخلي تولیدات نندارې ته اېښودل کېږي، هېڅ بهرنۍ تولید به نه وي. دا نندارتون په ډېر ښه وخت کې جوړېږي او د جوزا میاشتې له ۶ نېټې به تر ۱۱ نېټې ادامه ولري.»
پانګوال په دې اند دي چې د نندارتونونو له لارې توکو ته د بازار موندنې په برخه کې خپل اهداف ترلاسه کولی شي او په همدې موخه يې په راتلونکو څو ورځو کې د دې لوی نندارتون د جوړولو ته تابيا نيولې.
دوی د سرپرست حکومت ترڅنګ له خلکو هم غواړي چې د کورني صنعت د ودې لپاره دې له کورنيو توليداتو ګټه واخلي.
د افغانستان د نړیوال نندارتون رییس محمد صابر لطیفي وايي: « د افغانستان د نړیوال نندارتون ۷۰ سلنه موخه د افغانستان د صنعت وده او پراختیا ده. یو هېواد هېڅکله سیاسي، اقتصادي، ټولنیزې او فرهنګي هوساینې ته نه شي رسېدای،خو دا چې اقتصاد یې پر خپلو پښو ودرېږي. همدارنګه د یوه هېواد اقتصاد هېڅکله پر خپلو پښو نه شي درېدای، ترڅو د صنعت خاوند نه شي.»
مسوولین د صنعت اوونۍ په مناسبت ترسره کېدونکی نندارتون د صنعتي سکټور د ودې، پرمختګ او د افغانستان پر ځان بسیاينې موقع ګڼي او ډاډ ورکوي چې په نندارتون کې به نندارې ته وړاندې کېدونکي توکي په ۲۵ سلنه تخفيف سره وپلورل شي.
