کابل کې د جرمني له لوري پر ۵۰۰ اړمنو کورنیو مرستې ووېشل شوې

د افغان ماشومانو لپاره د جرمني موسسې  مشر محمد عالم شهاب وايي، په کابل کې ولایت کې  یې نن  پر شااوخوا ۵۰۰ بې وزله کورنیو مرستې ووېشلې.

شهاب وايي، په دغو مرستو کې اوړه، غوړي، لوبیا، چای او بوره شامل  دي.

شهاب زیاته کړه: «موږ دلته مواد راوړي چې په هغه موادو کې وریجې، غوړي، اوړه، بوره او چای شامل دي او کره مالومه نه ده، خو کېدای شي تر لس زره ایرو ارزښت ولري.»

اخوا د کابل د مهاجرینو رئیس قاري عبدالمتین رحیم زی بیا وایي، د کابل په ۲۲ حوزو کې یې سروې پیل کړې او هوډ لري چې ټولو بې وزلو کورنیو ته د اړتیا وړ مرستې وکړي.

رحیم زی وايي، د ژمي په را رسېدو خلک اړتیا لري چې ورسره مرستې وشي، خو له ځینو داخلي بې ځایه شوو بیا شکایت کوي، چې یو ځل یې تر خپلو ولایتونو ورسوي، بېرته راځي او بیا د مرستو غوښتنه کوي.

رحیم زی زیاتوي: «موږ ژمن یوو چې د کابل  ټولې حوزې ۲۲ دي او حوزه پر حوزه  ګرځو، سروې کوو او دا خلک له ډېر زیات اقتصادي مشکل سره مخ دي. موږ خو دا فکر کاوه چې پخواني حکومت خو په ملیاردونه ډالر درلودل او دې خلکو ته به یې رسیدنه کړې وي، خو متأسفانه.»

د افغان ماشومانو لپاره د جرمني د مرستو مؤسسه، په پام کې لري چې په راتلونکو ورځو کې هم ورته مرستې ووېشي.