مرسته شوې خرما د سعودي عربستان له لوري را استول شوې او د چهارشنبې په ورځ یوازې په کابل کې ۱۰۰۰ بې وزلو کورنیو ته د وېشلو لړۍ پیل شوه.
د دې خرما وېشونکې نور خیریه موسسه وايي، د کابل او کاپیسا په ګډون په پنځو ولایتونو کې د څلور زره کارټنه خرما وېشلو پلان لري.
د نور خیریه موسسې رییس حمید الله محمدي وايي: « د سعودي عربستان د دولت اړوند ملک سلمان مرکز له خوا د شهیدانو او معلولینو وزارت تر نظارت لاندې، ۴۰۰۰ کارټنه خرما وېش پیل شوی او په بېلابېلو ولایتونو کې به ووېشل شي. په دې ولایتونو کې کابل، میدان وردګ، لوګر، کاپیسا او پروان شامل دي. د وېشل کېدونکې خرما په هر کارټن کې ۸ کیلو خرما ده.»
په ورته مهال، د کابل شهیدانو او معلولینو چارو ریاست وايي، له دې وړاندې یې هم تر څار لاندې ګڼ شمېر بېوزلو کورنیو ته مرستې وېشل شوې دي او په پام کې ده چې له ۲۵۰ څخه زیاتو کورنیو ته خوراکي توکي او نغدې پیسې هم ووېشل شي.
د کابل شهیدانو او معلولینو چارو رییس شېر محمد صمیم وايي: « موږ له دې وړاندې خوراکي او زمیني توکي وېشلي او په راتلونکي کې هم پلان شته چې خوراکي او نغدي مرستې ووېشو. د دې مرستو لپاره تر ۳۰۰۰ تنو په پام کې نیول شوي.»
مرسته شوې خرما په کابل کې په سلګونه کورنیو د دې ولایت د شهیدانو او معلولینو چارو ریاست تر څار لاندې ووېشل شوه. دغه ریاست د نظارت موخه د مرستو د وېش په لړۍ کې د لا زیات شفافیت رامنځته کول په ګوته کوي.
