یو شمېر هېوادوال د روژې میاشتې په را رسېدو سره د کابل په بازارونو کې د خوراکي توکو د بیو له لوړېدو شکایت کوي.
دوی وایي، د دې پر ځای چې د روژې مبارکې میاشتې په مناسبت د توکو بیې راښکته شي؛ برعکس لوړېږي او دوی یې حتا د اخیستلو وس نه لري.
د کابل ښار اوسېدونکی عبدالوهاب وايي: « کله چې د روژې مبارکه میاشت راشي، نورو هېوادونو کې هرڅه ارزانه کېږي او نرخونه ښکته راځي، خو موږ چې ځانونه مسلمان او افغانان ګڼو، د روژې په راتګ سره نرخونه نور هم لوړ کړو. پرون له روژې مخکې یو کیلو رومیان په ۵۰ افغانۍ وو، نن په روژه کې په ۷۰ افغانۍ دي، دغه شان پرون یو من کچالو په ۱۴۰ افغانۍ وو، نن په ۱۷۰ افغانۍ دي. د روژې په لومړۍ ورځ د ټولو خوراکي توکو بې لوړې شوې، د کور د اړتیا وړ هر شي بیه لوړه شوې.»
د کابل ښار یو بل اوسېدونکی نذیرالله وايي: « زه د ارزان قیمت د سبزیو بازار ته راغلم، له روژې مخکې د یو کیلو بنډیو بیه ۴۰ افغانۍ وه، نن د روژې په لومړۍ ورځ یې ۷۰ افغانۍ ورکوي. دوکانداران وايي، تجاران یې له بهر راوړي او دوی ته هم پر لوړه بیه تمام دي.»
سوداګر او هټۍ وال یې بیا لامل په نړیوال بازار کې پر ډالرو راکړه ورکړه بولي او وایي، تر هغو چې افغانۍ د ډالر پر وړاندې ثابت حالت ونه لري، د خوراکي توکو بیې به همداسې بې ثباته وي.
سوادګر محمد یوسف مهمند وايي: « روان کال د بیو لوړېدو مختلف عوامل لري چې تر ټولو مهم یې د ډالرو لوړېدل دی. متأسفانه باید ووایم، کله چې ډالر لږ هم لوړ شي، زموږ سوداګر د توکیو بیې ډېرې لوړوي؛ خو کله چې ډالر ښکته شي، دوی بېرته نرخونه نه ټیټوي. بل لامل یې هم ژمی او د ورښتونو له امله د لارو بندېدل دي.»
د کابل یو تن هټۍ وال حمدالله وايي: « موږ دوکانداران جنس په ډالرو اخلو، کله چې شهزاده سرای ته لاړ شو، د یوه غله په څېر ډالر اخلو. د دې لپاره چې د ډالرو د قاچاق کوونکي په توګه مو څوک ونه نیسي، د دوکان اسناد او د کار جواز په جیب کې ګرځوم.»
د کابل ښاروالۍ مسوولین بیا د بیو د کنټرول ډاډ ورکوي او وایي، د تېرو کلونو په شان به د خوراکي توکو د بیو په اړه پر بازارونو پوره څار ولري او هېچا ته اجازه نه ورکوي چې په خپل سري ډول نرخونه لوړ کړي.
د کابل ښاروالۍ استازی نعمتالله بارکزی وايي: « کابل ښاروالي له معمول او خپلو اصولو سره سم، د لومړنیو توکو د نرخونو پر کنټرول جدي کار کوي. په بازار کې د ډالرو د نرخ ثبات ته په کتو، د توکو نرخونه هم په ښه حالت کې دي. موږ له ۱۵۵ شمېرې سره د اړیکو له لارې د خلکو په چوپړ کې یو؛ که چېرې څوک توکي ګران پلوري، خلک دې اړیکه ونیسي او زموږ ګرځنده ټیمونه به عاجل ځان ور ورسوي. موږ له ټولو هېوادوالو او سوداګرو هیله لرو چې د روژې په میاشت کې به له خپل وس سره سم همکار و اوسوو.»
د خوراکي توکو د بیو له لوړېدو څد خلکو شکایتونه په داسې حال کې دي چې د ځينو نړیوالو بنسټونو د راپورونو پر بنسټ، دا مهال په افغانستان کې دوه پر درېیمه برخه خلک ځان او کورنیو ته خوراکي توکي نه شي برابرولی او د بېوزلۍ له کرښې لاندې ژوند کوي.
