کابل ښاریان: له اسلامي اماراته غواړو غیر فعاله ادارې بېرته فعاله کړي 

د کابل ښار یو شمېر اوسېدونکي شکایت کوي چې د شااوخوا یوې نیمې میاشتې په تېرېدو لاهم ځنو ادارو ته مامورین نه دي ورګرځېدلي او چارې ولاړې دي.

په ورته وخت کې دوی وايي، روان وضعیت په بازار او د خلکو په ورځینو چارو منفي اغېزې کړي دي.

د  کابل ښار یو تن اوسېدونکی  وايي: «صرف موضوع د کار ده، يو حکومت چې شل کاله فعالیت وکړ، هم وپاشل شو، دا د يو کار مرحله ده، چې نړيوالې پيسې راشي، ځکه دولت خو په پيسو چليږي.»

یو شمېر ښاریان بیا د پاسپورت او برېښنايي تذکرو د ویش بهیر بیا پیل کولو غوښتنه کوي او له اسلامي امارته غواړي چې کابل هوايي ډګر دې نړیوالو الوتنو ته چمتو کړي.

د کابل ښار اوسېدونکی  وايي: «نظام ې بدل شوی دی، ستونزې ورسره زياتې شوي دي، ډېر خلک جيګرخون دي، بيخي کاروبار نشته دی. او پاسپورټونو خلک بيخي تنګ کړي دي، کار هم سټاپ شوی دي، باکونو هم سټاپ دی، بيخي کاروبار وران شوی دی.»

د کابل ښار یو بل تن اوسېدونکی وايي: «خو دا دی ۴۰ يا ۴۵ ورځې وشوې، چې نظام بدل شوی دی. ورسره حکومتي چارې پر ټپه ولاړې دي. که موږ د هوايي ډکر ستونزه ياده کړو، د پېژندپاڼې ستونزه د ويش ستونزه، د پاسپورټ ستونزه،نو زموږ د عامو افغانانو غوښتنه دا ده، چې زر تر زره له هوايي ډګره الوتنې پيل شي، تر څو هغه ستونزې چې خلک یې لري حل شي.»

د کابل ښار د اوسيدونکو په وينا د ځینو ادارو چارو نه فعاليت او دفترونو ته د کارکوونکو نه ورتګ، د دوی ژوند سخت کړی او ټولې برخې یې اغېزمنې کړي دي.

هڅه مو وکړه د خلکو اندېښنو په تړاو د مسوولو ادارو نظر هم ولرو، خو  پرله پیسې اړیکو سره سره بریالي نه شو.

که څه هم اسلامي امارت د دولتي چارو د سمون لپاره سرپرسته کابینه هم اعلان کړه، خو د نږدې یوې نیمې میاشتې په تېرېدو لاهم کابل کې یوشمېر ادارو خپلې چارې نه دي پیل کړي او مامورین یې خپلو دندو ته نه دي ستانه شوي.