پلازمېنه کابل چې څه د پاسه ۸ میلیونه تنه نفوس لري، شاوخوا ۳ ميليونه یې پاکو اوبو، برېښنا، روغتيايي او ښوونيزو بنسټونو ته لاس رسی نه لري.
د کابل والي ملا امین عبید له شمشاد سره په مرکه کې وايي، د نوي کابل ښار پروژې د لومړي فاز له بشپړېدو سره به د دې ښار ګڼه ګوڼه تر ډېره راکمه او ۳ میلیونو تنو ته به د استوګنې ځایونه برابر شي.
عبید په دې اړه وايي: « د نوي کابل ښار یو فاز افتتاح شو. دغه فاز په ۳۷۰ زره جریبه ځمکه جوړېږي او په کې ۳ میلیونو تنو ته د استوګنې ځایونه برابر شي او ورسره به دا ستونزه هم هواره شي.»
د کابل والي د دې ولایت په ولسوالیو کې اوبو، برېښنا، روغتیایي خدمتونو او ښوونیز بنسټونو ته د خلکو د لاسرسي نه شتوالي ستونزه مني او وايي، د دې ستونزو د هواري په موخه به په نېږدې راتلونکې کې يو شمېر پروژې پلې شي.
هغه زیاتوي:« یو پایپ لاین د چهارآسیاب له خوا راځي او بل اسلامي امارت پلان لري چې له پنجشیر سیند خلکو ته د څښاک اوبه برابرې کړي. د دغو پروژو قرارداد لا نه دی لاسلیک شوی، خو کله چې په شرایطو برابر شرکتونه پيدا شي، دا ستونزه به هم هواره شي.»
د کابل والي له شمشاد سره مرکه کې زياتوي، په پلازمېنه کې د شاوخو۷۰ زره جریبه غصب شویو ځمکو د بیا راګرځولو هڅه کوي او په دې تړاو يو شمېر اړین ګامونه پورته شوي هم دي.
هغه په دې اړه وايي: « څه کم ۴۰۰ زره جریبه ځمکه تر څېړنې لاندې ده. دغه کار درې پړاوونه لري، ځینې ځمکې تر څېړنې لاندې دي، ځینې یې تثبیت شوې او یو شمېر هم محاکمو ته سپارل شوې دي. دا د افغانستان په تاریخ کې یوه غټه لاسته راوړنه ده چې اسلامي امارت دولتي جایدادونه له زورواکو اخلي او بېرته یې نظام ته سپاري. تر اوسه ۷۰ زره جریبه غصب شوې ځمکه بېرته دولت ته سپارل شوې ده. په دې اړه به اسلامي امارت پرېکړه کوي چې له دغو ځمکو څه ډول ګټه واخلي.»
د کابل والي ښاريانو ته ډاډ ورکوي چې د اسلامي امارت امنيتي ځواکونه په ښار کې بشپړ امنيت تامين کړی او د هغو کسانو مخه نیسي چې غواړي د ښاريانو امنيت ننګولو هڅې وکړي.
