Skip to content
د افغانستان اسلامي امارت د صنايعو او سوداګرۍ وزارت له اسلام اباد راغلي پلاوي سره نوې پنځلس ماده ییزه هوکړه لاسليک کړې.
د هوکړې د دوهمې مادې له مخې،پاکستان هېواد ته حق ورکړل شوی دی، چې بې له زماني قيده افغانستان ته خپل اموال وليږدوي،خو افغانستان ته بیا په ټاکلو ورځو کې د خپلو سوداګريزو اموالو د ليږدولو حق ورکړل شوی دی.
افغانستان او پاکستان ترمنځ د سوداګریزې هوکړې یوه برخه:« د سوداګریزو توکو د انتقال مودې په اړه دواړه لوري دې پایلې ته ورسېدل،چې پاکستان په هغو ټرانزیټي توکو،چې د دوی له خاورې افغانستان ته داخل کیږي،هیڅ زماني قید نه وضع کوي. همدا رنګه افغانستان له خپلې خاورې څخه پاکستان ته د توکو د لیږد موده له ۵ ورځو څخه ۸ ورځو ته پورته کړه.»
دواړو لورو موافقه کړې ده،چې د روان ۲۰۲۲ زیږدیز کال د اګست میاشتې له پیل څخه د افغانستان او پاکستان ټولو سیمو ته به د دواړو هېوادونو بار وړونکې لارۍ ازاد تګ راتګ وکولای شي.
په شوې هوکړه ليک کې د افغانستان او پاکستان ترمنځ د سوادګريزو او ترانزيټي اسانتياوو په رامنځته کولو سيمه یيز اتصال او د داوړو هېوادونو وګړو ته د ويزو ورکړې په برخه کې د اسانتیاوو په رامنځته کولو او د مسافروړونکو بسونو په تګ راتګ هم توافق شوی دی.
افغانستان او پاکستان ترمنځ د سوداګریزې هوکړې یوه برخه:«موافقه وشوه،چې دواړه هېوادونه به د اګست میاشتې په پای کې په امتحاني توګه د مسافرو لېږد سورلۍ بسونو خدمتونه پیل کوي. په لومړي سر کې به له ۲ عرادې مجهز او عصري بسونو استفاده کیږي،چې پنځلس ورځې وروسته به له دواړو لوریو دا شمېر پنځه بسونو ته لوړوي. د یوې میاشتې په تېرېدو به دواړه لوري د خدماتو دقیقه ارزونه وکړي، تر څو د یادې چارې د ترسره کولو لپاره د بسونو شمېر مشخص کړي.»
اخوا د اقتصادي چارو یو شمېر شنونکي بیا نيوکه کوي،چې د اسلام اباد او کابل ترمنځ ترسره شوې هوکړه کې ترانسپورټي تعادل په پام کې نه دی نيول شوی او دغه چاره به د هېواد د سوداګرۍ لپاره ښیې پايلې ونه لري.
په هوکړه کې دا هم راغلي دي،چې په پاکستاني ګمرکونو کې به د هغو توکو طی مراحل ژر کوي،چې په حساس او لږ وخت کې خرابیږي او همدارنګه پاکستاني پلاوي هوکړه کړې،چې د نوې هوکړې تر لاسليک کولو پورې به د اپټا ۲۰۱۰ تړون هغه مواردو ته ژمن دي،چې توافق پرې شوی دی.
د ويلو ده،چې د اپټا ۲۰۱۰ تړون له مخې،د پاکستان ته د کراچۍ، قاسم او ګوادر بندرونو له لارې افغانستان ته د ترانزیټ اجازه ورکړل شوې وه.
